DILI, 21 Abríl 2026 (TATOLI) – Komisaun G ne’ebé Trata Asuntu Edukasaun, Juventude, Kultura no Sidadania rekomenda ba Ministériu Edukasaun (ME) atu reavalia klase paralela iha Uagia-Ossú, iha munisíiu Vikeke, ne’ebé antes ne’e taka, tanba fó impaktu ba estudante sira.
Deputadu relatór Komisaun G, Mateus da Cruz, hato’o ida-ne’e bainhira aprzenta relatóriu fiskalizasaun Komisaun nian ba iha eskola referida, iha reuniaun plenária Parlamentu Nasionál, ohin.
Bazeia ba fiskalizasaun no enkontru autoridade lokál, komunidade ho entidade relevante iha eskola Uagia konklui katak inkorénsia iha desizaun polítika no hamosu diskriminasaun.
Tanba komunidade sente katak iha padraun dupla husi ME, enkuantu eskola klase paralela sira iha munisípiu laran funsiona nafatin maski alunu menus kompara ho eskola klase paralela Uagia ne’ebé iha estudante 131, ne’ebé hetan apoiu maka’as husi komunidade, maibé taka tiha no ida-ne’e kria sentimentu injustisa sosiál iha povu nia leet.
“Klase paralela Uagia evidente tebetebes ba komunidade iha suku neen; Uagia, Uaibobo, Nahareka Osorua, Builo no Uaibobo, hodi fasilita asesu edukasaun ba estudante sira ne’ebé hela iha área remota”, nia hateten.
Tuir deputadu, desizaun taka eskola ne’e kontra prinsípiu ne’ebé hakbesik eskola ba komunidade. “Ho desizaun ne’e fó todan fíziku no finanseiru ba estutante sira ne’ebé tenke la’o ain husi dadersán nakukun tuku haat no fó risku ba sira-nia moris bainhira tempu udan tenke hakur mota”, dehan.
Komisaun konsidera ida-ne’e falla iha koordenasaun institusionál no autoridade munisipál ho diretór edukasaun munisipál, tanba komunikasaun la’o ladún di’ak no laiha konsulta lokál. “Komisaun rekomenda atu reabertura avaliasaun faktuál ba klase paralela Uagia”, nia afirma.
Lembra katak ME taka klase paralela ualu mak hanesan Kilik Uaegae-Baukau, Boaua Lavateri, Baguia-Baukau, 1912 Fahi Nehan-Manufahi, Babulo-Manufahi, Fernando Lasama-Manufahi, Fleixa-Manufahi, Olakasa Uaegae, Ossú-Vikeke, no Ponilala-Ermera.
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, antes ne’e klarifika desizaun ministériu nian hodi taka klase paralela ualu ba Parlamentu Nasionál, katak tuir diploma ministeriál ne’ebé hasai iha tinan kotuk fó limitasaun no observasaun direta ba klase paralela sira ne’ebé eziste no halo mudansa ruma no sira ne’ebé la prienxe rekizitu elimina tiha.
Tanba ne’e, ME liuhusi diresaun tékniku vokasionál halo avaliasaun rigoroza ba klase paralela ualu ne’ebé la prienxe rekizitu no ikus mai suspende tiha prosesu matrikulasaun ba désimu anu ka rejistasaun ba klase 10 iha ensinu sekundáriu no tékniku vokasionál. Klase paralela sira ne’e la prienxe rekizitu, tanba totál estudante maioria la to’o 150.
Notísia relevante: ME klarifika taka klase paralela Ensinu Sekundáriu Uagia
Jornalista: Nelson de Sousa
Editora: Maria Auxiliadora
