DILI, 21 Abríl 2026 (TATOLI)- Prezidente Repúblika José Ramos- Horta hato’o sentidu kondolénsia profundu ba família liga ho falesimentu Ministru Ensinu Superiór Siénsia no Teknolojia, José Honório ne’ebé lakon vida kauza husi moras kardiu vaskular nia kna’ar iha tersa (21/4) ohin.
“Sim, ha’u hakfodak simu informasaun. Klaru, kuandu joven, ida klosan ida, derrepente hetan iis kotu, mesmo que ita ladun koñese pesoalmente – triste. Triste tebtebes kuadru boot ida que Timor -Leste lakon”, José Ramos Horta hateten ba jornalista sira hafoin partisipa iha seremónia inagurasaun ba reabilitasaun edifísiu Banku Dezenvolvimentu Aziatiku iha Faról tersa, ohin.
Notísia relevante:Família sente lakon ho falesimentu Ministru José Honório
Tuir Xefe Estadu ne’e katak iha membru Governu iha tinan rua, tolu liubá Ministru Justisa no ohin mós situasaun hanesan akontese ba Ministru Edukasaun Ensinu Superiór.
“Ita haree la’ós ema ida que moras problema fuan karik, lae! Nia hanesan klosan hela mas idade, derrepente strock akontese, ema ida krekas ninia saúde ho la hatene kondisaun iha laran saida. Ne’e duni triste ba família, kondolénsia ba família tomak i ha’u sei haree saida mak Governu atu halo iha loron sira-nia laran”, Prezidente Repúblika José Ramos afirma.
Notísia relevante:Governu hato’o sentidu kondolénsia ba falesimentu Ministru José Honório
Jornalista: Natalino Costa
Editór: Rafael Ximenes de A. Belo
