DILI, 21 Abríl 2026 (TATOLI)-Primeiru-Ministru, Kay Rala Xanana Gusmão, akompañadu husi membru governu sira atribui sertifikadu lisensiamentu internasionál ba formadu na’in-13, hafoin ramata formasaun durante fulan neen-resin kona-ba operasaun mákina pezadu konstrusaun no seguransa iha servisu fatin.
Objetivu husi formasaun ne’e atu kapasita rekursu umanu iha área mekánika nian no redús fundu ba halo manutensaun ekipamentu pezadu iha Indonézia.
Prezidente IGEADI, Ana Paula da Cruz, informa ohin hanesan loron di’ak ida ba IGEADI tanba prepara timoroan na’in-13 bele gradua, hafoin tuir formasaun tékniku ba operasaun mákina pezadu no manutensaun ba mákina.
Entaun, benefisiáriu hirak ne’e prepara atu sai fali formadór (mestre) ba formandu foun sira, atu ba oin labele dependebte de’it ba nasaun seluk atu mai halo investimentu kapasitasaun rekursu umanu ba timoroan sira.
“Formasaun sira hanesan ne’e, ami halo fó lisensiamentu no akreditasaun, entaun sertifikadu ne’ebé sira hetan ne’e padraun internasionál. Signifika, aleinde sira servisu iha rai-laran, sira mós bele servisu iha rai-li’ur,” Prezidente IGEADI ne’e relata ba jornalista sira iha BJ. Habibie, ohin.
Nia afirma, ba oin sira sei kontinua loke ba públiku bazeia ba interese individuál nian hakarak envolve iha formasaun id- ne’e, no nia garante katak ekipamentu sufisiente ba formandu sira hodi uza, maibé sira mós iha kritéria mak hanesan tenke hatene lian inglés, iha esperiénsia ba mekániku, hatene lori viatura.
“Bainhira formasaun ramata ami sei haree rekursu ne’ebé iha poténsia ami sei destaka sira ba brigada ne’ebé IGEADI iha territóriu nasionál. Ami halo ona parséria ho universidade sira atu investe sira-nia rekursu ba formasaun ida-ne’e,” nia dehan.
Formadora husi IGEADI, Emilia Soares da Silva, hato’o agradesimentu ba parte kompetente liuliu Governu bele loke oportunidade tuir formasaun ida-ne’e hodi eleva sira-nia kapasidade lori mákina no halo manutensaun ba mákina.
“Entaun esperiénsia ne’ebé ha’u hetan durante ne’e mak iha servisu área mane nian liuliu ba konstrusaun no seguransa iha servisu fatin. Importante liu bele hetan sertifikadu ba akreditasaun internasionál ne’ebé bele ajuda aplika mós ba vaga sira iha rai-li’ur no muda nivel formandu sai formadora,” nia dehan.
Tamba ne’e, nia husu ba joven feto sira atu bele mós aprende lori mákina pezadu, tenke kompete ho mane sira atu hatudu sira-nia brani.
Jornalista : Alexandra da Costa
Editór : Cancio Ximenes
