DILI, 22 Abríl 2026 (TATOLI)—Governu liuhusi reuniaun Konsellu Ministrus, kuarta ne’e, aprova projetu Rezolusaun Governu ba ezonerasaun dirijente servisu iha Rejiaun Administrativa Espesiál Oekusi Ambenu (RAEOA) no nomea foun fali ba Prezidente RAEOA mak Régio da Cruz, Sekretáriu na’in-tolu no Diretór Rejionál na’in-21 RAEOA nian.
Notísia Relevante: Régio Salu retoma hikas funsaun nu’udar Prezidente Autoridade RAEOA
Projetu Rezolusaun Governu ne’e aprezenta hosi Ministru Administrasaun Estatál, Tomás do Rosário Cabral, ba ezonerasaun dirijente servisu iha Rejiaun Administrativa Espesiál Oekusi Ambenu (RAEOA) ne’ebé nomea liuhosi Rezolusaun Governu númeru 37/2025, loron 27 fulan-agostu no nomeasaun ba Prezidente, Sekretáriu no Diretór Rejionál sira RAEOA nian
Vise-Ministru ba Asuntu Parlamentár, Adérito Hugo, hateten rezolusaun ne’ebé aprezenta husi Ministériu Administrasaun Estatal kona-ba ezonerasaun seevisu dirijente iha RAEOA nian no nomea fali dirijente foun ho estatutu foun ne’ebé redefine ka halo tranzisaun fali modelu governasaun iha RAEOA ninian ho modelu governasaun husi munisípiu sira seluk.
“Entaun ida-ne’e mak MAE aprezenta no kontinua nafatin ezonera estrutura anteriór ho kargu xefia kuaze 100-resin, nune’e ho rezolusaun foun ne’e nomeia Sekretáriu rejiaun na’in-tolu no diretór departamentu na’in 20-resin, hanesan ho munisípiu sira seluk. Aleinde estrutura foun ne’e husi Oekusi oan hotu tuir komprometidu husi Xefe Governu nian,” Vise-Ministru ne’e informa ba jornalista sira iha Palásiu Governu, ohin.
Nia esplika, Prezidente Autoridade RAEOA nafatin lidera to’o loron 31 fulan-Dezembru 2026, ezonerasaun ne’e ba kargu xefia maibé dirijente RAEOA mantein nia mandatu, signifika estrutura foun nia iha dekretu-lei ketak bainhira mandatu Prezidente RAEOA nian
Nune’e ho rezolusaun ida-ne’e, Diretór-Jerál Rejionál no Diretór Rejionál sira ne’ebé hala’o hela funsaun hetan ezonerasaun, no Régio da Cruz hetan nomeasaun nu’udar Prezidente RAEOA.
Nomeia mós Sekretáriu Rejionál sira maka hanesan Salvador da Cruz, ba Administrasaun no Finansas, Francisco Loca, ba Planeamentu no Dezenvolvimentu, no mós Merita Marques Lafo, ba Asuntu Sosiál no Organizasaun Komunitária.
Tuir mai, hetan mós nomeasaun nu’udar Diretór Servisu Rejionál sira hanesan: Domingos Punef, Adelaide Rosália Faria Correia, Amâncio Aguido Punef, Augusto Jorge de Fátima Efi, Mário Coel, Anita da Costa Ruing, Vicêncio Cono, Odete Amado Martins, André Lao, Remígio Nuno Sila, Yoseph Ili, José Oki, Anastásia Eni, Fátima Olga Hei Amaral, Tomás José Tanessib Anuno, Júlio Coel, Domingos de Almeida, Orlando Quelo, José Ase Neno Colo, Cândido dos Reis Amaral no Jaime Taeque.
Entretantu, titulár kargu sira-ne’e sujeita ba avaliasaun dezempeñu anuál, no simu klasifikasaun ne’ebé la satisfatóriu sai baze hodi ezonera sira.
Notísia Relevante:Koñese kle’an Prezidente Autoridade RAEOA Interinu Celestinho Marques
Jornalista : Alexandra da Costa
Editór : Cancio Ximenes
