BOBONARU, 23 Abríl 2026 (TATOLI)-Governu no povu Japaun liuhusi Organizasaun Internasionál Frontline no Embaixada Japaun iha Timor-Leste inaugura no entrega sala maternidade iha Sentru Saúde Komunitária (SSK) Kakania, iha suku Lourba, postu administrativu Bobonaru, munisípiu Bobonaru, ba Governu hodi hasa’e atendimentu saúde materna ba inan isin-rua sira.
Diretór Frontline iha Timor-Leste, Yohei Kawaguchi, hateten katak instalasaun foun ida-ne’e konstrui hanesan estensaun ba SSK Lourba, ne’ebé anteriormente Frontline instala ona sistema painél solár no mákina ultrasonografia. Projetu ida-ne’e destina atu sai sentru saúde inan no labarik nian, ho objetivu atu fornese ambiente seguru ba feto isin-rua sira atu partu.
“Ami hakarak hadi’a situasaun saúde inan isin-rua no kosok-oan sira, atu inan isin-rua sira bele partu ho seguru no família sira bele haree bebé ho di’ak. Sala maternidade ida-ne’e la’ós fatin ba partu de’it, maibé hanesan sentru informasaun ba inan-aman, família sira, oinsá atu haree bebé ho di’ak”, nia hateten iha serimónia inaugurasaun ne’e.
Embaixadór Japaun iha Timor-Leste, Yamamoto Yasushi, subliña katak instalasaun saúde maternu-infantíl ida-ne’e la’ós de’it edifísiu ida, maibé hanesan símbolu esperansa nian ba inan no labarik sira iha Lourba no área besik sira.
Nia hateten katak komunidade iha Bobonaru hasoru dezafiu, liuliu transporte ne’ebé difísil iha tempu udan, tanba ne’e instalasaun ne’e importante tebes.
“Ho fasilidade foun ida-ne’e, agora iha ona enfermaria tolu hanesan ne’e iha munisípiu tomak. Ami rona katak taxa natalidade iha instalasaun saúde sira iha ne’e ki’ik liu duké média nasionál, no mortalidade materna no neonatál aas liu. Ami hein katak sala enfermaria ida-ne’e sei halo diferensa. Ha’u-nia esperansa sinsera maka fasilidade ida-ne’e sei uza husi komunidade suku Lourba”, nia dehan.
Vise-Ministru Saúde ba Asuntu Fortalesimentu Institusionál, José dos Reis Magno, agradese ba Governu Japaun ba nia kompromisu no solidariedade hodi kontinua apoia povu Timor-Leste dezde independénsia.
Governante ne’e dehan projetu ida-ne’e reflete kompromisu Governu nian atu fortalese sistema saúde nasionál sai asesivel liu, justu no reziliente.
“Saúde maternu-infantíl sai dezafíu boot iha Timor-Leste. Maski iha progesu, ita sei hasoru problema ho asesu, kualidade no utilizasaun servisu saúde iha área rurál no remota sira”, nia dehan.
Nia hatutan katak sala maternidade foun ida-ne’e prepara atu asegura kondisaun di’ak ba partu seguru, hadi’a kualidade tratamentu no hametin konfiansa ba servisu saúde.
Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, konsidera instalasaun foun ne’e sei ajuda Governu redús taxa mortalidade inan no oan iha Timor-Leste. “Ba komunidade besik iha ne’e kuandu buat ruma, lalika to’o ona Maliana. Kuandu inan isin-rua mak todan ona oin seluk. Di’ak liu hakbesik mai iha maternidade ida-ne’e”, nia dehan.
Projetu ida-ne’e implementa husi Frontline ho apoiu finanseiru husi Governu Japaun, hahú iha Abríl 2025 no ezekuta husi empreza lokál Afken Unipessaal Lda., ho valór orsamentu $183.092,45.
Notísia relevante: MS sei halo diskusaun ho Governu Japaun atu apoiu vasina dengue
Jornalista: Sergio da Cruz
Editora: Maria Auxiliadora
