DILI, 27 Abríl 2026 (TATOLI) – Parlamentu Nasionál (PN), liuhusi reuniaun plenária aprova votu pezár ba falesimentu Ministru Ensinu Superiór, Siénsia no Kultura (MESSK), José Honório da Costa Pereira Jerónimo.
Vise-Sekretária Meza PN, Maria Teresa Gusmão, hateten aprovasaun votu ida-ne’e órgaun soberania daruak ne’e hakarak espresa ninia profundu pezár ba falesimentu ba saudozu, ba família, ba Partidu Demokrátiku (PD) no ba amigu enlutadu hotu.
Deputada Frente Revolusionária Timor-Leste Independente (FRETILIN), Lídia Norberta, mós hateten votu pezár ne’e hatudu duni saida mak ema hotu sente lakon ida-ne’e.
“Hanoin ba membru Governu sira ne’ebé situasaun hanesan ne’e, tanba serbisu lakon sira-nia vida, órgaun soberania ida-ne’e hato’o votu pezár”, nia dehan.
Sancha Tilman, deputada husi Partidu Demokrátiku (PD), relembra saudozu ninia mensajen katak “desizaun partidu labele prejúdika serbisu Estadu nian”, ne’ebé haklaken ba polítiku sira hodi hatuur nia vizaun klara ba tempu naruk atu hadi’a povu no Estadu Timor-Leste nia vida
“[Saudozu nia] liafuan no hahalok sei la lakon husi ita-nia pensamentu no asaun hodi serbí povu no Estadu”, nia hateten.
Deputadu Luís Roberto husi Kmanek Haburas Unidade Nasionál Timoroan (KHUNTO) rekomenda ba Governu atu tau atensaun, liuliu koloka mós médiku ba membru Governu sira, tanba ida-ne’e akontese tanba hetan ataka kurasaun bainhira hala’o hela serbisu no labele hetan atendimentu lala’is to’o hakotu iis.
Ministru José Honório hakotu iis iha loron 21 fulan-Abríl tanba ataka kardíaku no lori bá Ospitál Nasionál Guido Valadares maibé la konsege salva nia vida.
Biografia Ministru José Honório
Moris iha Bazartete, Munisípiu Likisá, iha loron 15 Fevereiru 1973. Iha loron 01 fulan-Jullu tinan 2023, nia simu pose hanesan Ministru Ensinu Superiór, Siénsia no Kultura iha Governu Konstitusionál Dasiak, ho responsabilidade ba dezeña, ezekusaun, koordenasaun no avaliasaun polítika ba área ensinu no kualifikasaun nivel superiór, nomós ba área siénsia no teknolojia.
Hanesan ministru lidera inisiativa importante sira iha setór ensinu superiór, liuliu aprovasaun Lei Baze Ensinu Superiór, ne’ebé aprova husi Konsellu Ministru iha Fevereiru 2024 no husi Parlamentu Nasional iha Juñu 2024.
Nia mós lidera ajenda kooperasaun internasionál ne’ebé ativu, ho objetivu atu estabelese parseria ba bolsa estudu no programa formasaun ba estudante no tékniku timoroan sira.
Antes asume kargu nu’udar ministru, José Honório hala’o servisu hanesan dosente iha Universidade Nasionál Timor Lorosa’e (UNTL).
Iha tinan 2001, nia hetan grau lisensiatura iha Estudu Dezenvolvimentu iha Instituto de Tecnologia e Ciências Mandala iha Indonézia, no remata kursu mestradu iha Estudu Dezenvolvimentu iha Universitas Kristen Satya Wacana, Salatiga (Indonézia) iha tinan 2010.
Iha 2001 ne’e kedas, José Honório hanesan dosente iha Fakuldade Ekonomia iha Departamentu Ekonomia no Estudu Dezenvolvimentu iha UNTL.
Iha UNTL, José Honório asume kargu oioin mak hanesan Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante sira iha Fakuldade Ekonomia no Jestaun (2011-2013), Pró-Reitór Administrasaun, Planeamentu no Finansa (2016-2020) no Pró-Reitór Inspesaun, Auditoria no Kontrolu Kualidade (2021-2023).
Ministru José Honório mós sai hanesan membru Konsellu Jerál UNTL iha períodu 2015 to’o 2016. Iha 2013-2015, José Honório hala’o funsaun hanesan Adidu Komérsiu iha Embaixada Repúblika Demokrátika Timor-Leste iha Jakarta, Indonézia.
Iha tinan 1994, José Honório sai membru organizasaun estudantíl ne’ebé hanaran “Rezisténsia Nasionál Estudante Timor-Leste” (RENETIL), ne’ebé funda iha tinan 1988 husi estudante timoroan sira iha Indonézia ho objetivu atu luta ba independénsia Timor-Leste.
Notísia relevante: Ministru José Honório haloot ona iha nia rezidénsia Ekali-Likisá
Jornalista: Nelson de Sousa
Editora: Maria Auxiliadora
