OEKUSI, 27 Abríl 2026 (TATOLI) – Atualidade, ohin segunda-feira ne’e, Koordenadór Zona Ekonómia Espesiál Dezenvolvimentu Oekusi Ambeno (ZEEDOA), Herculano de Sousa entrega relatóriu mandatu, ba Prezidente Autoridade Rejiaun Administrativa Espesiál Oekusi Ambeno (RAEOA) Régio da Cruz Salu, molok Governu fó tomada pose ba Prezidente RAEOA ho estrutura iha loron tersa-feira (aban), 28 Abríl 2026 ne’e.
Notísia relevante:Herculano Sousa ‘dúvida’ Governu ezonera estrutura RAEOA la inklui ZEEDOA
Tuir observasaun Jornalista Ajénsia Tatoli, I.P, Koordenadór ZEEDOA to’o iha Gabinete Prezidente Autoridade RAEOA iha oras tuku 10:00 dadersan, akompaña ho nia Xefe Gabinete no funsionáriu sira, ne’ebé simu direta husi Prezidente Autoridade RAEOA, Régio da Cruz Salu.
“Ohin, ha’u mai entrega ha’u-nia relatóriu mandatu remata ba Prezidente Autoridade no mós felisita estrutura foun atu lidera RAEOA. Ha’u hein katak, ekipa ne’e sei hala’o serbisu ho di’ak,” nia hateten ba Jornalista sira iha Gabinete Prezidente RAEOA, ohin.
Notísia relevante:Koordenadór ZEEDOA prontu simu desizaun husi Governu Sentrál
Iha biban ne’e mós, Koordenadór ZEEDOA ne’e rekomenda ba Prezidente Autoridade ho estrutura, atu kontinua finaliza elaborasaun Planu Estratéjiku Dezenvovimentu (PED) Rejionál Oekusi nian ba tinan-lima, tanba tuir ajenda, fulan-Jullu 2026 ne’e tenke aprezenta ona ba Konsellu-Ministru hodi hetan paresér.
“Ohin ha’u rekomenda ba Prezidente Autoridade RAEOA, katak serbisu prinsipál ida maka presiza finaliza PED Oekusi nian ba tinan-lima, tanba antes ne’e ha’u mak responsabiliza másimu ba elaborasaun, ne’ebé hahú tiha ona, maibé infelizmente tanba mudansa ida-ne’e, entaun ha’u husu, Oekusi tenke iha planu rasik ba tinan-lima ba oin, tanba Primeiru-Ministru husu bebeik planu ne’e,” nia haktuir.
Nia esplika, relatóriu ne’e, la entrega ezbosu, maibé iha relatóriu ne’e sira mós katak, ZEEDOA halo ona serbisu balun, tanba ne’e mak Autoridade RAEOA liuhusi ba Diresaun Rejionál Planeamentu Dezenvolvimentu, tenke konsdiera PED rejionál ne’e sai prioridade.
Notísia relevante:http://Koordenador ZEEDOA kontinua husu klarifikasaun ba Governu Sentral kona-ba nia estatutu
Liga ho asuntu ne’e, Jornalista Ajénsia Tatoli,I.P tenta atu konfirma ho Prezidente Autoridade Autoridade RAEOA, Régio da Cruz Salu, maibé okupadu ho serbisu seluk, tanba prepara hela ba seremónia tomada pose, ne’ebé sei hala’o iha salaun Konvensaun Palaban, iha loron tersa-feira, 28 Abríl 2026.
Jornalista: Abílio Elo Nini
Editór: Rafael Ximenes de A. Belo
