DILI, 30 Abríl 2026 (TATOLI) – Prezidente Kamára Komérsiu no Indústria Timor-Leste (CCI-TL, sigla portugés), Jorge Serrano, simu vizita kortezia Embaixadór Japaun iha Timor-Leste, Yamamoto Yasushi, hodi diskute futuru kooperasaun iha setór privadu.
Durante enkontru, Embaixadór Yamamoto Yasushi espresa agradesimentu ba oportunidade vizita CCI-TL no aborda kona-ba kooperasaun iha futuru. Nia destaka katak, ho adezaun Timor-Leste ba ASEAN, empreza japoneza barak manifesta nia interese investe iha país.
“Ida-ne’e oportunidade di’ak ba setór privadu sira nasaun rua ne’e bele halo kooperasaun iha futuru”, Yamamoto Yasushi hateten iha edifísiu CCI-TL, Dili, ohin.
Iha fatin hanesan, Prezidente CCI-TL, Jorge Serrano, salienta katak vizita husi embaixadór atu reforsa parseria ezistente entre nasaun rua.
“Ne’e nu’udar enkontru dahuluk, ita haree prioridade saida mak emprezáriu Timor-Leste no Japaun bele halo. Ita hotu hatene Japaun nu’udar parseiru importante ba Timor-Leste iha tempu barak nia laran”, nia dehan.
Tuir Jorge Serrano, kooperasaun entre Timor-Leste no Japaun ne’e fundamentál, tanba konta ho kontribusaun empreza japoneza ba dezenvolvimentu país hanesan Tsuneishi Timor Shipbuilding, ne’ebé sei halo investimentu iha Laleia, no empreza ITOCHU Corporation, ne’ebé sei implementa projetu enerjia fotovoltaika (PV) iha Manatutu.
“Vizita sira ne’e atu reforsa parseria sira ne’ebé iha tiha ona. Ha’u kontente tebes vizita ida-ne’e no hakarak iha nafatin kontaktu entre setór privadu Timor-Leste no Japaun, tanba sira hakarak promove investimentu Japaun iha Timór, nune’e ita hamutuk dezenvolve nasaun, liuliu fó empregu ba timoroan sira”, nia konklui.
Notísia relevante: UE no CCI-TL aborda kooperasaun hodi apoia setór privadu nasionál
Jornalista: Arminda Fonseca
Editora: Maria Auxiliadora
