DILI, 30 Abríl 2026 (TATOLI)—Governu Konstitusionál da-sia (IX) liuhusi Ministériu Saúde sei halo akordu hodi asina memorandu entendimentu ho Governu Brunei Darusalam hodi fortalese kooperasaun iha setór saúde.
Proposta ne’e aprezenta husi Vise-Ministru ba Fortalesimentu Institusionál Saúde, José dos Reis Magno, iha reuniaun Konsellu Ministru, kuarta ne’e, iha Palásiu Governu.
Memorandu Entendimentu ida-ne’e ho objetivu prinsipál atu estabelese kuadru kooperasaun ida entre nasaun rua ne’e, bazeia ba respeitu no benefísiu mútua, ho hanoin atu hametin servisu saúde no dezenvolve setór ne’e.
Vise-Ministru ba Asuntu Parlamentár, Adérito Hugo, Primeiru-Ministru sei ba halo vizita ofisiál ba Brunei Darusalam tanba kestaun relasaun bilaterál, nune’e aproveita ho ida-ne’e iha ministériu balun prepara memorandu entre Timor-Leste ho Brunei Darusalam nian.
“Akordu ne’e define termu oioin, negosiasaun la’o antes tiha ona, iha setór saúde nian iha kompromisu reforsa kooperasaun detallu iha setór saúde liuliu kapasitasaun rekursu umanu,” Vise-Ministru Saúde ne’e hateten ba jornalista sira iha Palásiu Governu, ohin.
Governante ne’e dehan, kapasitasaun rekursu umanu ne’e importante tebes hanesan formasaun ba médiku sira no apoiu fasilidade.
Enkuantu área prinsipál sira ba kooperasaun mak servisu saúde, prevensaun no kontrolu moras, dezenvolvimentu rekursu umanu nomós reforsu infraestrutura ba ospitál sira.
Aleinde kooperasaun ne’e bele inklui fahe informasaun no koñesimentu, troka espesialista sira, formasaun téknika, hala’o semináriu no mós dezenvolve projetu konjuntu.
Jornalista : Alexandra da Costa
Editór : Cancio Ximenes
