OEKUSI, 30 Abríl 2026 (TATOLI) – Ministériu Edukasaun (ME) liuhusi Sekretáriu Estadu Ensinu Sekundáriu no Tékniku Vokasionál, Domingos Lopes Lemos, kinta ne’e, monitoriza prosesu instalasaun materiál Sentru Téknolojia Informasaun (ICT) hanesan komputadór no projetór sira iha eskola Tékniku Vokasionál no Sekundáriu Jerál iha Rejiaun Administrativa Espesiál Oekusi Ambeno (RAEOA).
“Ami mai Oekusi ho objetivu atu observa prosesu instalasaun ekipamentu dijitalizasaun iha eskola sira liliu ba ensinu sekundáriu jerál no tékniku vokasionál sira iha Oekusi, tanba prosesu instalasaun ne’e konklui ona hodi utiliza ba prosesu aprendizajén,” nia hateten iha Eskola Tékniku Vokasionál Palaban, ohin.
Notísia relevante:Garante eskola seguru, ME ho OMS kapasita inspetór eskolár 12 iha Oekusi
Governante ne’e esplika, materiál dijitalizasaun ne’e hanesan Sentru Téknolojia Informasaun (ICT) komputadór sira no projetór hodi uza ba atividade prosesu aprendizajén, tanba polítika husi Ministériu Edukasaun hakarak moderniza prosesu ensinu aprendizajén iha eskola sira.
Liliu, profesór sira tanba durante tinan barak, profesór sira hanorin estudante ho manual de’it, hakerek iha kuadru hodi fó impaktu ba saúde, tan ne’e mak komesa tinan kotuk, Ministériu Edukasaun hahú distribui materiál ba eskola sira iha territóriu tomak hodi moderniza prosesu aprendizajén.
“Ne’ebé, tinan ne’e hahú tama ba faze implementasaun ba eskola sira hotu, hodi hanorin uza komputadór no projetór bele mós fó espasu ba estudante atu apreende di’ak liután, karik eskola sira-ne’ebé komputadór la sufisiénte, ita sei aumenta tan,” nia hateten.
Notísia relevante:ME kontinua prioriza fasilidade ICT atu moderniza prosesu aprendizajen
Diretór Diresaun Rejionál Edukasaun Oekusi, Vincêncio Cono, orgullu tanba Ministériu Edukasaun bele observa direita prosesu intalasaun materiál ICT sira iha estabelesimentu ensinu sira.
“Ita orgullu, tanba bele oferese tan projetór neen iha eskola sekundáriu Palaban, ne’ebé prezensa Ministériu Edukasuan iha Oekusi importante atu observa direta, karik eskola ne’ebé mak sei falta, bele alista kedas atu hetan tan apoia iha futuru, tanba polítika ministériu hakarak moderniza prosesu prosesu aprendizajén ho dijitalizasaun,” nia orgullu.
Notísia relevante:ANC fahe esperiénsia ba estudante feto iha área ICT
Entretantu, tuir ajénda ne’ebé Ajénsia Tatoli,I.P asesu, Sekretáriu Estadu Ensinu Sekundáriu no Tékniku Vokasionál, Domingos Lopes Lemos, sei hala’o vizita ba eskola Sekundériu Tékniku Vokasionál Agrikultura Oekusi, São João Paulo Pássabe no EVT Lifau Mahata inklui eskola sekundáriu públiku sira hanesan, ESG Palaban, Baqui no Eskola Sekundáriu Katólika Santo António Oekusi.
Jornalista: Abílio Elo Nini
Editór: Rafael Ximenes de A. Belo
