OEKUSI, 20 Outubru 2025 (TATOLI) – Sekretáriu Estadu Ensinu Sekundáriu Jerál (ESG, sigla Portugés) no Ensinu Tékniku Vokasionál (ETV), Domingos Lopes Lemos, informa Governu liuhusi Ministériu Edukasaun (ME) sei kontinua tau prioridade atu investe fasilidade ba Sentru Informasaun Teknolojia (ICT) ba Eskola Tékniku Vokasionál sira iha territóriu hodi moderniza prosesu ensinu aprendizajen.
Notísia relevante:ME lansa Sentru Informasaun Teknolojia iha Oekusi
Governante ne’e konfirma asuntu ne’e, bainhira hala’o vizita ofisiál ba Sentru Informasaun Téknolojia (ICT) iha Eskola Bázika Sentrál (EBC, sigla portugés) Tula-Ika Aenmat iha suku Lifau sub-rejiaun Pante Makasar Rejiaun Administrativa Espesiál Oekusi Ambeno (RAEOA), segunda ohin.
Tuir governante ne’e, iha eskola idak-idak liu-liu tékniku vokasionál sira presiza aumenta fasilidade komputadór, nune’e bele utiliza halo prátika, hodi apoia ba prosesu aprendizajen nian.
“Investimentu ba setór edukasaun importante atu haree ba futuru, tanba ne’e ami sempre vizita ba eskola sira hotu iha kada munisipíu, haree ba andamentu no progresu sira, maibé iha munisipíu balun ita tenke aumenta investimentu liu-liu ba Ensinu tékniku vokasionál sira. Ami sei prevee osan atu aumenta fasilidade teknolojia ka Sentru Informasaun Teknolojia (ICT) ninian, nune’e moderniza uitoan la barak, saida mak prosesu ensinu sira iha eskola liu-liu ba tékniku vokasionál. Tan ne’e, ita-nia planu ba tinan oin sei di’ak liután,” nia hateten, iha EBC Tula-Ika Aenmat, ohin.
Autoridade governativa ne’e hateten, kona-ba rekursu umanu, husi parte edukasaun konsidera sufisiente, tanba foin lalais ne’e, Ministériu Edukasaun rekruta profesór sira liuhusi bolsa kandidatu da-tolu ba ensinu báziku, no daudaun ne’e Diresaun Ensinu Sekundáriu Jerál no Tékniku Vokasionál halo ona nia mapeamentu, nune’e iha tempu-badak sei koloka tan profesór ba ensinu sekundáriu no tékniku vokasionál sira hamutuk na’in-700 iha territóriu.
“Maibé ita mós presiza investe iha ICT atu tulun profesór no estudante sira,” nia afirma.
Notísia relevante:Embaixadór Índia observa Sentru TIC haat iha Oé-Cusse
Iha biban ne’e, Prezidente Autoridade RAEOA, Régio da Cruz Salu, promete katak, RAEOA prontu atu serbisu hamutuk, tanba antes ne’e Governu konstrui ona sentru formasaun ba profesór sira, hodi utiliza hasa’e koñesimentu.
“Ha’u konkorda tebes ho polítika Ministériu Edukasaun kona-ba serbisu apoia ICT nian, nune’e bele kontinua halo eskola sira sai sentru atu mai buka aprende no haforsa ita-nia kapasidade. RAEOA sei haree ba oin oinsá serbisu hamutuk ba asuntu ne’e atu haforsa ICT iha Oekusi liu-liu eskola sira-ne’ebé hetan ona, tanba bainhira tama ona ezame nasionál, depois sei tama ona ba universitáriu no balun direitamente ba ona kampu traballu,” nia hateten.
Entretantu, Diretór Diresaun Rejionál Edukasaun no Solidariedade Sosiál, Vincencio Cono, relata katak, iha Oekusi estabelesimentu ensinu haat mak hetan ona Sentru Informasaun Teknolojia (ICT), mak hanesan, Eskola Bázika Sentrál (EBC, sigla portugés) Tula-Ika Aenmat, EBC Oésilo, Eskola Tékniku Agrikola Rejiaun Oekusi (ETARO) no Eskola Tékniku Vokasionál Palaban.
Notísia relevante:Funsionáriu Edukasaun RAEOA partisipa formasaun kona-ba teknolojia informasaun
Jornalista: Abílio Elo Nini
Editór: Rafael Ximenes de A. Belo
