OEKUSI, 28 Fevereiru 2025 (TATOLI) – Funsionáriu na’in-27 husi Diresaun Rejionál Edukasaun Oekusi, kinta ne’e, partisipaformasaun hodi hasa’e koñesimentu kona-ba informasaun no teknolojia iha Sentru Informasaun Teknolojia (ICT) ne’ebé lokaliza iha Santa-Rosa, suku Costa, sub-rejiaun Pante Makassar.
Formasaun ne’e abertura direitamente husi Sekretaria Rejionál ba Edukasaun no Asuntu Sosiál (SREAS), Inácia Tamele, hanesan faze dahuluk iha tinan 2025. Formamadu sira kompostu husi klase báziku hamutuk 13 no klase intermedia na’in-14.
Notísia relevante:Sentru formasaun profesór iha Pante Makasar inaugura ona
“Ohin, ita abertura ona formasun ida ne’e atu fasilita funsionáriu sira ne’ebé seidauk domina loloos komputador. Entaun ita bo’ot sira tuir formasaun ida ne’e atubele aumenta imi nia koñesimentu tanba ita hala’o servisu uza teknolojia, nune’e presiza hakle’an imi nia koñesimentu ba iha sentru formasaun ne’e,” nia dehan iha sesanun abertura.
Sekretária Rejionál ba Edukasaun no Asuntu Sosiál ne’e husu ba formadu sira atu kumpre pontualidade, dixipliña, tama ho oras, no labele falta tanba formasaun ne’e fazeadamente.
“Imi tenke aprende ho didi’ak tanba ha’u sei kontrola imi, no haree imi nia prezensa. Ha’u husu imi atu iha pontualidade durante kursu la’o, tanba aprende mak ita mai tarde entaun ita mós tarde atu aprende materia ne’ebé mak fasilitadór sira fahe ba ita”, nia apela.
Iha fatin hanesan, Octoviano Francisco Oqui, nu’udar formadór iha sentru formasaun ne’e, esplika katak sentru formasaun ne’e hala’o semana ida dala rua hodi fahe ba klase rua.
Iha loron tersa-feira no kinta-feira ba klase báziku sei tuir kursu dala rua iha semana ida nia laran, no klase intermediu sei tuir formasaun iha loron kuarta-feira no sesta-feira.
“Semana ida, kada klase sei aprende oras haat. Husi formasaun ne’e, formandu sira tenke kompleta oras 92 mak foin tuir teste finál atu bele hetan sertifikadu apresiasaun. Tan ne’e ha’u iha esperansa katak depois deformasaun, funsionáriu sira-ne’ebé tuir ona formasaun iha ne’e sei hatene feramenta sira-ne’ebé durante aprende husi formadór,” nia dehan
Entretantu, materia sira-ne’ebé formandu sira sei aprende mak hanesan tuir mai ne’e, Hardware, formandu sira sei aprende kona-ba introdusaun ba sistema operasionál komputadór, Software, aprende kona-ba introduasaun sistema operasaun no sistema aplikasaun komputadór no Word processing (word document), atu aprende oinsa halo formasaun karta konvite, pedidu, relatoriu, oinsa print no screen
Aleinde ne’e, aprende tan Spead Sheet (xis), aprende halo kalkulasaun iha mikrosoft office, excel ho formasaun sira hanesan, autosum, average, count, countif, IF, sumif no sumifs, round, servisu ho database, soft no filtru dadfus, statistika no gráfiku no Presentations, aprende oinsa dezenvolve lide aprezentasaun, oinsa aumenta efeitu animasaun no audio visuál no oinsa halo aprezentasaun pesoál.
Notísia relevante:ME lansa Sentru Informasaun Teknolojia iha Oekusi
Jornalista: Abílio Elo Nini
Editór: Florencio Miranda Ximenes
