DILI, 30 Abríl 2026 (TATOLI) – Produsaun foos ho marka “Mana Boot” daudaun paradu tanba produsaun menus husi parte agrikultór sira, nune’e Kámara Komérsiu no Indústria Timor-Leste (CCI-TL) insentiva investimentu diretu husi setór privadu sira.
Prezidente CCI-TL, Jorge Serrano, hateten foos “Mana Boot” lansa ona iha tinan kotuk hanesan projetu pilotu ida, ne’ebé hatudu katak Timor-Leste mós bele prodús rasik foos. Lansamentu halo husi Primeiru-Ministru, Xanana Gusmão, ho objetivu apoiu agrikultura lokál, hasa’e kualidade produsaun, no hamenus dependénsia ba importasaun.
Enkuantu, tuir nia, hafoin lansamentu, CCI-TL fó uluk oportunidade ba agrikultór sira halo natar, oferese apoiu tékniku, inklui fó fertlizante, fini no formasaun. Maibé, produsaun la atinje no fó impaktu ba produsaun paradu.
“Agora ami dudu setór privadu mak halo investimentu rasik, nune’e bele dezenvolve foos ne’e ho másimu, bele asegura marka ida-ne’e no bele tau iha merkadu”, Jorge Serrano hateten ba Tatoli, iha Akait, Dili, ohin.
Nia agradese tebes ba preokupasaun públika kona-ba foos “Mana Boot” no hateten katak emprezáriu sira identifika ona área agríkola (natar) iha fatin balun. Ministériu Justisa mós haree ona rai, nune’e empreza rua ka tolu iha seriedade atu investe iha projetu ne’e.
Tuir Serrano, área identifikada varia ektare 1.000 no 2.000. Se kontratu mak konsege formaliza, investimentu ne’e bele komesa.
Nia dehan investimentu setór privadu ida-ne’e la’ós atu hamate agrikultór sira, maibé kompleta sira-nia produsaun, tanba seidauk sufisiente atu responde ba prokura. “Bainhira produsaun la’o ona, ita mós sei tau teknolojia ne’ebé moderna uitoan para depois bele asegura mós produsaun ho kualidade”, hateten.
Aleinde foos, emprezáriu balun planeia investe iha pekuária, hanesan hakiak animál, ho objetivu atu redús no substitui importasaun.
Ho esforsu sira, Serrano admite katak setór privadu enfrenta difikuldade hanesan asesu ba rai, no finansiamentu. Maibé, garante katak emprezáriu sira nafatin halo esforsu kontribui ba dezenvolvimentu ekonómiku nasaun.
Notísia relevante: CCI-TL prodús foos marka “Mana boot” nu’udar prezente alternativa ba modernizasaun agrikultura ihaTimor-Leste
Jornalista: Arminda Fonseca
Editora: Maria Auxiliadora
