CCI-TL prodús foos marka “Mana boot” nu’udar prezente alternativa ba modernizasaun agrikultura ihaTimor-Leste

Agrikultura hanesan fatuk-inan ba Timor-Leste nia ekonomia. Maibé, setór ne’e istorikamente karakteriza ho produtividade ne’ebé ki’ik, agrikultura ho nível subsisténsia, no falta asesu ba teknolojia modernu sira. Atu hasoru dezafiu sira ne’e, Cámara Comércio no Indústria Timor-Leste (CCI-TL) lansa ona produtus foos ho marka “mana boot” ho nia objetivu prinsipál mak transforma setór agrikultura sai agrikultura ida modernu no sustentavel iha agora no aban. Aleinda ne’e mós, Nu’udar pasu importante ne’ebé CCI-TL halo nu’udar parseria Governu nian hodi alkansa hamutuk mehi ne’ebé Timor-Leste hakarak katak “han saida mak ita prodús no kuda saida mak ita han”, nufim atinji mehi boot Seguransa Ai-han iha Timor-Leste ba Timor oan tomak.

Esforsu briliante ne’e, hanesan mós kontribuisaun direta setór privadu sira-nian atu haburas ekonomia familiar agrikultór hamutuk 65% uma-kain iha área rurál, iklui aumenta produsaun foos nasionalmente hodi lori kresimentu ekonomia nasionál husi setór agrikultura ba Timor-Leste iha futuru. Nune’e atan hau hakarak louva no fo apresiasaun ba CCI-TL ne’ebé hahú ezekuta alternativa foun hodi hatan ba preukupasaun Timoroan sira-nian durante tinan rua nolu resin lima nia laran atu minimiza no eradika dependénsia Timor-Leste nian ba importasaun foos besik porsentu 70  husi nasaun Vietnam, Cambodia inklui Atambua.

Loos dunik katak,  investimentu sira husi setór públiku de’it la too atu hasae produsaun foos iha rai-laran. Realidade mós hatudu ona, durante dékada rua nia laran Timor-Leste seidauk konsege, tanba setór agríkola rasik hasoru dezafiu oioin hanesan 1)Asesu limitadu ba fini, adubu, no mákina ho kualidade. 2)Infraestrutura ne’ebé ladún di’ak hanesan estrada ne’ebé la adekuadu, fasilidade armazenamentu ne’ebé laiha, no sistema irrigasaun ne’ebé la konfiavel. 3)Produsaun agríkola ne’ebé ki’ik tanba tékniku to’os ne’ebé antigu ona. 4)Dependénsia nu’udar agrikultura subsisténsia, ne’ebé impede agrikultór sira atu tama iha merkadu lukrativu sira. 5)Nível aas husi lakon sira hafoin kolleta tanba rai nia kondisaun kuaze moras todan.

Maski nune’e, Prezidenti CCI-TL husi nia diskursu iha loron lansamentu hateten katak, CCI-TL komprometidu no prontu realiza mehi sira ne’e ho lalais tanba CCI-TL hatene lolos no momos katak agrikultura mós setór ekonómiku xave e importante, aleinde mina no turizmu, tanba ne’e dunik tempu to’o ona atu  moderniza no utiliza prátika sira ne’ebé avansadu hahú agora no ba oin.

Susesu husi lansamentu foos ho marca ‘mana boot’ tuir atan ha’u-nia pontu-de-vista, esforsu hirak ne’e  la’ós de’it produsaun foos,  maibé liu tan ida-ne’e; katak tulun no apoiu setór publiku nu’udar parseiru Governu nian hodi mellora setór Agrikultura liuhusi melloria servisu sub-setorál sira hanesan tuirmai ne’e”

1. Promove Investimentu Agro-Negósiu. CCI-TL servisu atu atrai investimentu lokál no internasionál hodi hasa’e produsaun agríkola. Liuhusi haburas parseria entre investidór privadu sira no agrikultór sira, CCI-TL iha objetivu atu fornese ba agrikultór sira asesu di’ak liután ba input agríkola modernu sira hanesan fini ho kualidade aas, adubu, no mákina avansadu sira. Parseria sira-ne’e hein atu hasa’e produtividade no efisiénsia iha operasaun agríkola sira.
2. Hasae Kapasidade no Formasaun ba Agrikultór sira. Iha kolaborasaun ho organizasaun internasionál no instituisaun lokál sira, CCI-TL organiza hela programa formasaun hodi ekipa agrikultór sira ho koñesimentu kona-ba prátika agrikultura modernu. Sesaun treinamentu sira ne’e kobre tópiku sira hanesan: -Tékniku agríkola ne’ebé sustentável. -Agrikultura ne’ebé matenek ba klima hodi hamenus efeitu sira husi mudansa klimátika.     -Agrikultura mekanizada no sistema irigasaun modernu. -Jestaun  pós-kolleita hodi hamenus lakon sira. Katak produsaun sira ne’ebé husi agrikultór sira sai kompetitivu liután liuhosi hasa’e produsaun no asegura katak sira nia produtu tuir padraun merkadu nian.
3. Hadi’a Asesu ba Merkadu no Hametin Kadeia de Valór sira. Asesu ba merkadu lokál no internasionál sai nafatin obstákulu boot ida ba agrikultór timoroan sira. CCI-TL nia inisiativa sira asesu ba merkadu foka ba harii kadeia fornesimentu ne’ebé liga agrikultór sira diretamente ba sosa-na’in sira, hodi nune’e halakon intermediáriu sira no hadi’a agrikultór sira-nia rendimentu. Ho forma seluk CCI-TL promove dadaun dezenvolvimentu indústria agro-prosesamentu nian ne’ebé sei permite agrikultór sira atu aumenta valór ba sira nia produtu prima, hodi halo sira sai atrativu liu ba kompradór doméstiku no internasionál sira.
4. Dezenvolvimentu Infraestrutura. CCI-TL durante ne’e halo advokasia ba Governu liu husi Ministerio kompetenti sira ba dezenvolvimentu infraestrutura rurál hodi suporta kresimentu agrikultura. Ida-ne’e inklui: -Konstrui estrada rurál sira ne’ebé di’ak liu atu fasilita transporte sasán sira hosi to’os sira ba merkadu sira. -Estabelese fasilidade armazenamentu hodi hamenus lakon pós-kolleita. -Dezenvolve sistema irigasaun hodi hadi’a jestaun bee, asegura produsaun ai-horis ne’ebé konsistente. Tanba liuhusi hadi’a infraestrutura, mak sei ajuda CCI-TL no Agricultor hodi ultrapasa obstákulu sira ne’ebé impede sira atu partisipa tomak iha merkadu agríkola lokál no globál.
5. Promove Agrikultura Sustentável no Intelijente ba Klima. Sustentabilidade mak núkleu husi inisiativa sira CCI-TL nian. CCI-TL promove hela prátika agrikultura ne’ebé amigavel ba ambiente hanesan agrikultura orgánika, jestaun integradu ba peste sira, no agrofloresta. Métodu sira-ne’e la’ós de’it proteje ambiente maibé mós asegura produtividade ba tempu naruk liuhosi mantein saúde rai nian no hamenus dependénsia ba input kímiku sira. Aleinde ne’e, prátika sira ne’ebé matenek kona-ba klima introdús hela atu ajuda agrikultór sira adapta ba padraun tempu ne’ebé labele prevee ne’ebé kauza hosi mudansa klimátika.

Hipóteze: Impaktu Husi Alternativa Modernizasaun Setór Agrikultura Timor-Leste

Depois tiha lansamento fos ho marca mana boot iha loron 5 fulan Setembro 2024, atan hau optimista tebes hakarak halo deklarasaun hipoteza; Karik CCI-TL kontinua promove investimentu, advokasia ba dezenvolvimentu infraestrutura, no inisiativa hasa’e kapasidade, entaun setór agrikultura Timor-Leste nian sei hetan melloramentu signifikativu iha produtividade, seguransa ai-han, no jerasaun rendimentu durante dékada oin mai. Maibé, susesu hosi inisiativa sira-ne’e sei depende ba fatór xave sira tuir mai:

• Investimentu iha teknolojia: Aumenta agrikultór nia konsensializasaun atu adopta teknolojia agríkola modernu, hanesan sistema irigasaun no mekanizasaun, sei fó impaktu diretamente ba produsaun agríkola.
• Loke asesu ba merkadu no kadeia de valór: Asegura katak agrikultór sira iha asesu di’ak liu ba merkadu sira sei sai krusiál ba sira nia lukru no sustentabilidade ba tempu naruk.
• Governu nia apoiu: Envolvimentu governu liu-liu Ministerio da Agricultura tenki ativu, inklui halo reforma polítika no apoiu finanseiru, hodi komplementa CCI-TL nia esforsu.
• Sustentabilidade: Adosaun ba prátika sira ne’ebé sustentável no intelijente ba klima sei determina viabilidade agrikultura nian ba tempu naruk hasoru dezafiu ambientál sira.

Hipoteza sira iha leten iha ona evidensia barak hanesan tuir mai ne’e;

• Aumentu Produtividade: Rejiaun sira ne’ebé adopta no ajusta ona modernizasaun agríkola, iha melloria substansiál ba produsaun ai-horis no produtividade jerál. Ezemplu, nasaun sira ne’ebé investe iha mekanizasaun no irigasaun relata ona aumentu to’o 40% iha kada tinan iha produsaun. exp Xina, Etopia, no Indonesia rasik.
• Hadi’a Meius Subsisténsia: Estudu barak hatudu katak bainhira agrikultór sira integradu iha kadeia de valór no hetan asesu ba merkadu sira, Agricultor nia nível kunesementu no esperiénsia aumentu iha rendimentu. Faktus hatudu katak inisiativa sira iha agro-prosesamentu no ligasaun merkadu hatudu hasae rendimentu agrikultór sira-nian bele too 20-30%.
• Hamenus Lakon Pós-Kolleita: Hadi’a infraestrutura, partikularmente iha armazenamentu no transporte, bele hamenus lakon pós-kolleita to’o 50%, hodi permite agrikultór sira atu rai sira-nia produtu barak liután hodi fa’an.

Biar nune’e, CCI-TL mos sei hasoru difikuldade sira hanesan:

• Asesu limitadu ba finansa: Agrikultór sira iha Timor-Leste sei luta makaas atu hetan asesu ba kapitál ne’ebé presiza atu investe iha teknolojia no input foun sira. Katak, CCI-TL deit sei labele responde ida ne’e.
• Atrazu iha infraestrutura: Ritmu dezenvolvimentu infraestrutura, liuliu iha área rurál, lao neneik tanba dezafiu finansiamentu no lojístiku. Katak, presiza hadiak mekanizmu ezekusaun obra sira ne’ebé lao latuir kalendariu kontratu laran.
• Vulnerabilidade Klimátika: Nu’udar nasaun illa ki’ik ida, Timor-Leste vulnerável tebes ba impaktu sira hosi mudansa klimátika, ne’ebé bele kompensa benefísiu sira hosi modernizasaun agríkola lahó estratéjia adekuadu sira ne’ebé reziliente ba klima. Katak, CCI-TL sei laiha kbiit atu preve bainhira akontese desatre naturais no laiha forza atu kontra forza natureza bainhira akontese

Husi argumentu no hipoteza simples sira iha leten, hau atan hakarak konklui mos katak, CCI-TL nia alternativa nee’e,  hanesan reprezenta ne’ebé promisór ba modernizasaun setór agríkola Timor-Leste nian, aleinde alternativa foun seluk ne’ebé sei mai. See karik implementa ho efetivu no hetan apoiu polítika husi governu, esforsu sira-ne’e bele rezulta iha melloria signifikativu sira iha produtividade, asesu ba merkadu no sustentabilidade. Bot liu tan bele trava lafaek husi rai liur ne’ebé horut osan dollar  hodi  hamate korenti agronegosiu iha Timor-Leste.  Maibé, keta haluha mos katak, susesu husi altenativa ida ne’e sei depende hodi ultrapasa dezafiu oioin no presiza tebes vontade politika ne’ebé seriu husi makaer ukun sira, inklui reseolve no tulun limitasaun finansiamentu no lakuna infraestrutura.

Parabens no hakat ba oin CCI-TL, foku ho kontinuadu ba inovasaun, sustentabilidade, no empoderamentu agrikultór mak savi hodi forma futuru agrikultura iha Timor-Leste sai riku, forte no seguru.

Bom Susesu CCI-TL no AGRIKULTÓR TIMOR-LESTE

Agrikultura Timor-Leste sei sai Forte, Riku no Seguru iha Futuru Timor-Leste