BAUKAU, 04 Maiu 2026 (TATOLI)—Progresu konstrusaun morru protesaun mota Samalari, Baukau Vila, atualmente atinje ona pursentu 100 no iha hela faze retensaun.
Koordenadór Tékniku Obra Públika Destakadu Munisipiu Baukau, Diego Cipriano Caleza, esplika projetu referidu foin ramata (atinje 100) iha fulan-Abríl no tuir planu sei intrega obra iha tinan-2027.
“Projetu konstrusaun morru protesaun ne’e pursentu 100 ona,” Koordenadór Tékniku Obra Públika Destakadu Munisipiu Baukau informa ba TATOLI iha ninia kna’ar fatin, Vila Nova, Segunda ne’e.
Caleza relata Ministériu Obra Públika (MOP) liuhusi delegasaun iha Munisípiu Baukau sei akompaña projetu referida durante períodu retensaun iha-ne’ebé bainhira mosu estragu sei responsabiliza husi kompañia to’o projetu referida intrega ba Governu.
Entretantu, projetu konstrusaun morru protesaun mota Samalari responsabiliza husi kompañia rua kompostu Mauko Contractions, Lda no BTL Unipessoal, Lda ho durasaun serbisu tinan-tolu, gastu orsamentu hamutuk millaun $3.900 ho distánsia kilómetru 2.3.
Jornalista: Natalino Belo
Editór: Xisto Freitas da Piedade
