DILI, 05 Maiu 2026 (TATOLI)—Sekretarária Estadu Formasaun Profissionál no Empregu (SEFOPE) hamutuk ho Japan International Cooperation Agency (JICA) diskute kona-ba sira-nia planu atu konstrui sentru formasaun lian Japaun (Japanese Language Training Center/JLTC) iha Tibar, Líkisa.
Sekretáriu Estadu Formasaun no Empregu, Rogério Araújo Mendonça, akompaña husi Diretór Jerál SEFOPE, Carlito Cabral, ohin hasoru malu ho Representante JICA ba Timor-Leste, Daisuke Fukumori iha Edifísiu JICA, Dili, ohin.
“Enkontru ne’e hodi esplora posibilidade konstrusaun sentru treinamentu refere no mós hametin unidade treinamentu sira-ne’ebé iha ona sentru treinamentu Tibar, refere komunikadu imprensa ne’ebé TATOLI asesu, ohin.
Nune’e SEFOPE hato’o apresiasaun ba JICA nia resposta pozitivu ne’ebé planeia forma ekipa teknika hodi halo estudu ba proposta konstrusaun JLTC, tuir kritériu kooperasaun téknika instituisaun nian.
Hafoin enkontru, konsellu Asesór SEFOPE, Ilidio Ximenes da Costa, kontinua akompaña ekipa JICA halo vizita ba sentru treinamentu Tibar hodi haree direta fatin ne’ebé planeia ba konstrusaun sentru treinamentu lian Japaun.
Tuir akordu SEFOPE nian, hatete katak kooperasaun bilaterál entre Governu Timor-Leste no Japaun durante ne’e di’ak tebes, liu-liu iha dezenvolvimentu rekursu umanu no infrastrutura, tamba komitmentu ne’e reforsa liuhusi deklarasaun hamutuk entre Primeiru-Ministru Japaun, Fumio Kishida no Primeiru-Ministru Timor-Leste, Kay Rala Xanana Gusmão iha fulan-Dezembru 2023 iha Tokyo.
“Aleinde ne’e, nasaun rua ne’e mós asina memorandu entendimentu kona-ba Programa Treinamentu Estagiariu Tékniku (Technical Intern Training/TIT) iha fulan- Outubru 2024, ho objetivu transfere abilidade no téknika ba jerasaun foun Timor-Leste nian no loke oportunidade servisu iha li’ur,” nia dehan.
SEFOPE rejista to’o agora iha timoroan na’in-78 ona iha Japaun, enkuantu timoroan na’in-22 seluk hala’o hela formasaun lian Japaun iha Sentru Treinamentu Becora. Enkuantu pedidu adisionál husi instituisaun Japaun hakarak aumenta tan traballadór, planu simu partisipante foun na’in- 33, maibé ho limitasaun fasilidade treinamentu sei sai dezafiu boot.
“Agora, treinamentu lian Japaun seidauk uza sala iha Bekora ne’ebé sufisiente, tentativa uluk atu konstrui sentru treinamentu iha Tasi-Tolu mós lahetan rezultadu tanba problema proprietáriu (disputa) ba rai nian,” nia hateten.
Nia hatutan SEFOPE mós hato’o pedidu ba JICA atu konstrui fasilidade treinamentu ne’ebé inklui sala ho aircon, labaratóriu lian, dormitóriu ba estudante no profesór, no fasilidade apoiu hanesan biblioteka, sistema rejistu no koneksaun internet.
“Atu hametin fasilidade treinamentu tékniku iha Tibar, inklui unidade soldadura, eletrisidade, agrikultura, turizmu, kadeira, marítimu, otomotivu, tubusaun no apoiu ekipamentu modernu ba treinamentu,” nia afirma.
Nia énfaze, maske hasoru dezafiu oioin, SEFOPE dehan otimista katak ho kompromisu forte hosi Governu Timor-Leste no Japaun, ba konstrusaun sentru treinamentu lian Japaun iha Tibar bele realiza lalis hodi hametin kapasidade forsa servisu nasionál no alarga asesu ba merkadu internasionál.
TATOLI
