DILI, 06 Maiu 2026 (TATOLI)–Prezidente Komisaun Rekrutamentu Kandidatu Estudante Akademia Militár Konjunta 2026, Nuno Corvelo, informa, aplikante hamutuk na’in-214 partisipa iha prova kulturál.
“Kandidatu sira ne’e selesiona husi munisípiu sira, nune’e komisaun halo verifikasaun ba sira-nia dokumentu iha ema na’in-320 no na’in-124 mak liu selesaun dokumentu. Agora sira ne’ebé liu ne’e submete mai prova kulturál. Prosesu ida-ne’e importante atu haree, se kandidatu sira kumpre rekezitu molok tama ba etapa tuir mai,” Nuno Corvelo hateten ba Jornalista sira hafoin observa prova kulturál iha Fakuldade Enjeñaria Siénsia Teknolojia, Hera, Kuarta ne’e.
Iha prova kulturál, kandidatu sira tuir teste ba matéria tolu hanesan matemátika, portugéz no ingléz.
“Prova ida-ne’e sei determina sé mak bele kontinua ba etapa tuir mai. Komisaun mós define kritéria klaru kona-ba altura no idade atu garante kandidatu sira iha kondisaun atu tuir treinamentu. Ba mane altura labele menus husi metru 164 no ba feto metru 160,” nia akresenta.
Notísia relevante : Kandidatu estudante Akademia Militár Konjunta na’in-214 admitidu iha selesaun dokumentu
Ba kandidatu estudante akademia militár konjunta ne’e tenke idade husi 17 to’o 20 no bainhira iha Fulan-Dezembru agora mak idade 21 ne’e labele ona.
“Ami tenke haree sira-nia idade produtivu atubele dezenvolve sira-nia karreira militár,” nia katak.
Iha prosesu ida-ne’e komisaun mós identifika katak kandidatu barak mak la liu tanba problema dokumentus.
“Maioria kandidatu sira la aprezenta dokumentus komprovativu kona-ba sira-nia formasaun edukasaun ba 12o ano, tanba ne’e mak barak los la liu,” nia tenik.
Maski nune’e komisaun sei kontinua ho faze selasaun tuir mai no kandidatu sira ne’ebé liu hotu prosesu sei hetan oportunidade atu tama no tuir estudu iha Akademia Militár.
“Prosesu ida-ne’e rigór no laiha familiarizmu, prosesu selesaun ida-ne’e la haree, nia ne’e jenerál ka ofisiál no veteranu nia oan, tanba ami komisaun iha kompromisiu atu lori prosesu ne’e ho transparante,” nia dehan.
Agora faze prova kulturál, iha ne’e mak laliu maka komisaun sei elemina hodi labele hakat ba faze tuir mai, ne’ebé barak mak hato’o katak kandidatu sira ne’ebé pasa iha prova kulturál sei pasa ba teste médiku no fíziku no to’o loron-10 sira iha Akademia Militár iha Aileu.
“Ita sei iha selebrasaun ema na’in-60 iha faze dahuluk ba Akademia Militár Konjunta,” nia hato’o.
Iha fatin hanesan, Aplikante vaga Akademia Militár Konjunta 2026, Devia de Jesus Amaral sente kontente tanba bele konkorre vaga no iha esperansa hakarak sai militár.
“Ha’u husi Munisípiu Aileu, ha’u sente kontente bele konkorre iha akademia militár ida-ne’e no ba oin mak liu hakarak sai militár hodi defende ita-nia rai, sai militár ne’e mehi dezde uluk kiik kedas,” nia hato’o.
Nune’e mós, Aplikante vaga, Samuel Nilton Soares, sente kontente bele iha aplika iha vaga.
“Ha’u-nia esperansa mak ne’e, lakon ka manán la’ós kestaun, maibé buat ne’ebé motiva mak ne’e nu’udar timoroan tenke kontribui ba ita-nia rai,” nia tenik.
Jornalista : Natalino Costa
Editora : Julia Chatarina
