DILI, 07 Maiu 2026 (TATOLI)—Diretór Nasionál Rekursu Umanu Ministériu Edukasaun (ME), João Amaral, informa rekrutamentu manorin ba eskola Sentru Aprendizajen no Formasaun Eskolár (CAFE-sigla portugeza) no eskola katólika hein prosesu legál husi Ministériu Edukasaun hodi taka sai ba públiku.
Diretór João dehan nia parte seidauk bele fó-sai bainhira mak taka sai maibé ein-prinsípiu prosesu administrasaun ba dokumentu loos hotu ona, hein parte legál.
“Kona-ba rekrutamentu profesór ba eskola katólika no eskola CAFE nian, daudaun ne’e ami simu ona dokumentu husi CONECTIL no parte CAFE. Agora iha prosesu nia laran no ita hein hela husi parte legál ka juri sira, nun’e ita halo rekrutamentu tuir lei ne’ebé vigór atu labele fó impaktu ba iha rekrutamentu,” nia ba jornalista sira iha nia kna’ar fatin, Vila-Verde, Dili, Kinta ne’e.
Dirijente ne’e esplika tuir dadus ne’ebé iha, eskola katólika prefere rekruta manorin hamutuk 200 no CAFE 200.
João haktuir rekrutamentu profesór ba iha eskola katólika foka liubá ensinu báziku de’it no ba iha eskola CAFE mak ba iha pre-eskolár, ensinu báziku no ensinu sekundáriu.
Iha biban ne’e, nia mós klarifika katak informasaun kona-ba projetu CAFE bolu de’it profesór ba hanorin ne’e laloos, tanba sira nunka bolu ema seluk atu bá hanorin sein koñesimentu husi rekursu umanu, tanba sira iha kontratu termu sertu ba profesór sira-ne’ebé hanorin iha CAFE. Manorin bolsa kandidatu sira-ne’ebé Ministériu Edukasaun iha, sira halo termu aseitasaun mak foin koloka ba no sira-ne’e provizoriamente sei hanorin hodi hein manorin 200 ne’ebé mak rekruta hodi taka.
Iha sorin seluk, Prezidente Ezekutivu Komisaun Nasionál Edukasaun Katólika Timor-Leste (CONECTIL-sigla portugeza), Pe. António Quenser, hateten prosesu hotu-hotu iha Ministériu Edukasaun nia liman.
“Pur-enkuantu, ha’u seidauk bele halo komentáriu tanba asuntu ne’e sei iha hela prosesu nia laran,” Padre Quenser dehan.
Entretantu, Ministra Edukasaun, Dulce de Jesus Soares, informa rekrutamentu manorin ba eskola CAFE no eskola katólika hein taka sai ba públiku tanba dokumentu hotu-hotu loos ona.
“Iha tempu badak ita bele fó-sai vaga rekrutamentu ne’e,” Ministra Dulce tenik.
Jornalista: Osória Marques
Editór: Xisto Freitas da Piedade
