BOBONARU, 08 Maiu 2026 (TATOLI)-Xefe Suku Ritabou, Maximiano dos Santos Araújo, preokupa ho kazu karau lakon, nune’e rekomenda ba Governu atu kria regulamentu ida kona-ba atividade fa’an no sosa karau hodi redús kazu ne’e iha munisípiu Bobonaru.
Maximiano hato’o rekomendasaun ne’e tanba suku Ritabou iha tinan barak ona sempre akontese kazu ema na’ok komunidade nia karau no foin lalais ne’e karau tolu lakon iha aldeia Diru Aban, Moleana no Timatan.
Nia esplika katak problema ne’e semana rua liubá karau na’in balun hato’o kestaun ne’e ba deputada Maria Barreto Gorumali, hodi levanta iha Parlamentu Nasionál. Tuirmai, Komandu Jerál Polisía Nasionâl Timor-leste (PNTL) orienta ona membru sira buka informasaun iha terrenu, maibé to’o agora seidauk identifika autór ba kazu ne’e.
Notísia relevante: Autoridade Lakluta prefere populasaun fa’an karau tenke hasai lisensa husi xefe suku
“Ha’u rekomenda ba parte kompetente atu kria regulamentu ida ba ema ne’ebé fa’an no oho karau. Se fa’an tenke iha lisensa no surat husi xefe aldeia ho vistu pelu xefe suku. Parte rua tenke mai ho identidade kompletu atu evita karau lakon ne’e”, nia dehan ba Tatoli, iha sede suku Ritabou, sesta ne’e.
Membru komunidade Maliana, Josefina de Jesus Sequeira, mós husu ba Governu presiza atu tau atensaun ba asuntu ne’e, tanba haki’ak-na’in sira la sente seguru.
“Problema ida-ne’e la’os foin akontese, más ita atu buka tuir ema ida na’ok ne’e susar, tanba nia mai ita lahatene. Se bele ita-nia governu buka meiu oinsá kontrola ema sira fa’an no oho animál sira ne’e. Karau ne’ebé fa’an no atu oho ne’e tenke iha lista, ninia kór ho nia marka tenke kompletu”, nia sujere.
Nia dehan komunidade durante kalan sempre halo vijilansia troka-malu to’o dadeer tanba kazu na’ok karau kontinua buras iha suku no aldeia.
“Se la rezolve problema, ami baruk ona atu haki’ak karuk, tanba ami haki’ak ba mós hanesan de’it, ema seluk mak bokur”, nia lamenta.
Sekretariu Estadu Pekuária, José Vieira de Araújo, ne’ebé vizita komunidade iha Bobonaru rona mós preokupasaun kona-ba karau lakon.
Notísia relevante: Forsa konjunta deporta Indonéziu ida mai buka nia karau
Jornalista: Sergio da Cruz
Editora: Maria Auxiliadora
