DILI, 11 Maiu 2026 (TATOLI)–Portavós Polísia Nasionál Timor-Leste (PNTL), Superintendente Xefe Polísia, João Belo dos Reis, informa, kazu omesídiu ne’ebé akontese iha Aldeia Poros, Suku Mehara, Postu Administrativu Tutuala, Munisípiu Lautein, iha Domingu (10/5) tuku 01: 30, ne’ebé rezulta Vincêncio de Jesus Fernandes, lakon vida, daudaun rejista ona iha Ministériu Públiku (MP).
Polísia konsege detein ona suspeitu na’in-10 ho inisiál LRH, DdSB, MBS, MF, MB, AF, RF, MG, IDC no LP inklui membru FALINTIL-Forsa Defeza Timor-Leste (F-FDTL) na’in-ida.
Kazu ne’e rejista ona iha MP ho Númeru Úniku Kriminál (NUK) 0028/2026.LACIC.
Portavós Polísia haktuir, kazu ne’e rezulta mós alin ida ho naran Rivaldo Caetano Lopes hetan kanek.
“Atuasaun ne’e entre grupu rua, grupu ida husi Suku Asalainu husi Lospalos ba fatin serimónia família iha Suku Mehara, Aldeia Poros. Iha akontesimentu ida-ne’e sira iha problema depois rezulta ita-nia alin mane ne’e mate no depois Polísia halo kedas atuasaun”, João Belo hateten liuhusi konferénsia imprensa ne’ebé halo iha Komandu Jerál PNTL, Kaikoli, Segunda ne’e.
Notísia relevante : Komandu F-FDTL sei foti medida hasoru oknum suspeitadu ba kazu omisídiu Poros
Hafoin akontesimentu ne’e, Polísia mós halo kedan koordenasaun ho parte F-FDTL ninian tanba deskonfia autór sira ne’ebé ba asalta fatin serimónia ne’e iha mós elementu Militár balun.
“Nune’e, koordenasaun ne’ebé halo no depois sira halo kedas operasaun hodi rezulta ema na’in-10 kaptura iha fatin ne’ebá. Ne’ebé kazu ne’e rasik rejista ona ho númeru NUK 0028/2026.LASIC,” nia akresenta.
MP promove suspeitu sira ho krime omesídiu argavadu tuir artigu 140, artigu 145 ne’ebé ko’alia kona-ba interrupsaun ba gravidéz ne’ebé la hetan punisaun artigu 146, ne’ebé kona-ba krime infantisisu artigu 185 kona-ba violasaun ba domisíliu no artigu 260 ne’ebé ko’alia kona-ba violénsia.
Portavós Polísia dehan, promove suspeitu sira ho krime omesídiu agravadu tanba baku malu no rezulta ema ne’e mate.
Tuir Komandante PNTL, laiha separasaun prosesu ba iha pesoál F-FDTL ne’ebé envolve kazu omesídiu tanba nia hanesan sidadaun baibain no prosesu ne’e la haree nia ne’e sé.
“Laiha separasaun, kuandu membru husi instituisaun ida halo krime ita konsidera hanesan sidadaun baibain. Ita aprezenta hanesan sidadaun komún,” nia katak.
Polísia rasik halo ona koordenasaun ho parte F-FDTL atu haree ba kazu ne’e no Komandu F-FDTL aseita halo prosesu ba pesoál ne’ebé envolve.
“Ita-nia koordenasaun ho F-FDTL la’o nafatin, saida mak nia halo laiha ligasaun ba nia knaar hanesan FDTL. Ita-nia koordenasaun ho parte F-FDTL la’o di’ak tebes, nune’e prosesu hotu ita sei submete ba iha Ministériu Públiku,” nia tenik.
Komandu PNTL seidauk bele fó detallu kona-ba kazu ne’e tanba sei iha prosesu investigasaun nia laran.
Nia esplika, fatin akontesimentu kontroladu tanba kooperasaun ho autoridade lokál no joventude inklui F-FDTL sira apoiu seguransa.
“Mate isin agora prosesu autopsia sei la’o hodi bele hatene loloos. Nia kronolijia ne’e depois sei entrega ba nia família iha tempu badak hafoin ramata autopsia,” nia tenik.
Jornalista : Natalino Costa
Editora : Julia Chatarina
