DILI, 18 Maiu 2026 (TATOLI)—Embaixadór Emiradu Árabe Unidu (EAU), Abdulla Salem AIDhaheri, hala’o enkontru ho Primeiru-Ministru, Kayrala Xanana Gusmão, hodi diskute kona-ba kooperasaun bilarerál no husu Governu Timor-Leste aselera prosesu finalizasaun ba akordu tratadu taxa dupla no protesaun investimentu.
Embaixadór ne’e hateten, ohin sira hala’o enkontru ida-ne’ebé di’ak tebes maske sira hatene katak durante loron hirak ne’e sira okupadu tebes liuliu ba preparasaun loron restaurasaun independénsia nian.
“Iha enkontru ne’e ami ko’alia kona-ba koolaborasaun servisu iha área oioin ne’ebé importante ba parte rua hotu, ami mós ko’alia kona-ba projetu prinsipál ida-ne’ebé ami atu selebra baibain ami bolu “groundbreaking” ka hahú konstrusaun ba alojamentu estudante feto sira-nian, ne’ebé sei realiza iha loron 20 Maiu,” Embaixadór ne’e informa ba jornalista sira iha Palásiu Governu, ohin.
Iha biban ne’e, sira mós diskute kona-ba kompromisu importante ida ho diplomata timoroan sira, ne’ebé sei partisipa ho akademia diplomátika Anwar Gargash iha Emiradu Árabe Unidu, nune’e nia hein katak atividade ida-ne’e bele implementa iha trimestre dahaat tinan ida-ne’e.
“Maibé ami enfatiza importánsia husi asinatura tratadu prinsipál rua no akordu prinsipál rua, ida mak tratadu taxa dupla (double taxation treaty) no ida seluk mak akordu protesaun investimentu.
“Ami hakarak apoiu husi Prezidente Repúblika no Primeiru-Ministru atu aselera prosesu finalizasaun ba akordu rua ne’e, atu nune’e Emiradu Árabe Unidu no investidór sira husi UAE bele mai buka oportunidade kolaborasaun iha Timor-Leste,” nia dehan.
Tanba relasaun entre Timor-Leste no United Arab Emirates sempre di’ak tebe-tebes, sira mós transmite sira-nia apresiasaun ba Governu Timor-Leste tanba sempre fó apoiu no solidariedade ba EUA durante tempu defisíl ida-ne’e, ligadu ho agresaun husi Iaran ba sira-nia nasaun no rejiaun GCC.
“Ami sempre kontente bainhira ko’alia kona-ba relasaun entre Emiradu Árabe Unidu no Timor-Leste, ami hein katak buat hotu sei la’o di’ak nafatin no ami sei buka nafatin área kolaborasaun no solidariedade,” nia hateten.
Enkuantu, nia haktuir, durante enkontru ne’e nia transmite tiha ona saudasaun husi Prezidente Estadu Unidu Árabe, Alteza Sheikh Mohammed Bin Zayed Al Nahyan, nomós saudasaun husi Vise-Prezidente Estadu Unidu Árabe, Sheikh Mansour bin Zayed Al Nahyan.
Jornalista : Alexandra da Costa
Editór : Cancio Ximenes
