DILI, 19 Maiu 2026 (TATOLI)–Sekretáriu Jerál Asosiasaun Nasaun Sudeste Aziátiku (ASEAN), Kao Kim Hourn, tersa ne’e, hasoru malu ho Prezidente Repúblika, José Ramos-Horta, hodi diskute kona-ba progresu integrasaun Timor-Leste nian no preparasaun ba oin atu sai prezidente ASEAN iha tinan 2029.
Sekretáriu Jerál (ASEAN), Kao Kim Hourn, hato’o katak vizita serbisu ne’e bazeia ba konvite husi Governu Timor-Leste liuhusi Vise-Primeiru-Ministru no Ministru Negósiu Estranjeiru no Kooperasaun (MNEK), hodi partisipa mós iha selebrasaun loron Restaurasaun Independénsia ba da-24.
“Ami foin de’it ramata vizita kortezia ho Súa Exelénsia Prezidente Ramos-Horta. Ha’u uza oportunidade ne’e atu fó sai informasaun foun ba súa Exelénsia Prezidente kona-ba integrasaun ASEAN nian agora liuliu kona-ba integrasaun kontínua Timor-Leste nian iha komunidade ASEAN,” Kao Kim hateten hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Aleinde ne’e, parte rua mós ko’alia kona-ba situasaun jerál iha rai-laran, estabilidade no dame ne’ebé Timor-Leste ne’ebé sai nu’udar fundamentu forte ba transformasaun rai-laran.
Sekretáriu Jerál ne’e esplika, asuntu estratéjiku ida-ne’ebé sai mós kbiit iha diskusaun ne’e mak kona-ba oinsá Timor-Leste prepara an atu prezide ASEAN iha tinan ne’ebé mai.
“Asuntu prinsipál mak ko’alia kona-ba Timor-Leste nu’udar membru plenu ona ba ASEAN no preparasaun ba oin oinsá, liuliu preparasaun atu prezide ASEAN iha tinan 2029,” nia dehan.
Sekretariadu Jerál ASEAN hamutuk ho estadu membru sira seluk kompromete ona atu fó apoiu másimu, liuliu iha área kapasitasaun (capacity building) hodi hametin rekursu umanu no instituisionál, nune’e Timor-Leste bele susesu wainhira sai prezidente ba bloku rejionál ne’e.
Enkontru ne’e mós sai hanesan pasu importante ida atu re-afirma pozisaun Timor-Leste nian ne’ebé foin lalais mós partisipa ona iha série enkontru simeira ASEAN nian.
Jornalista : Hortêncio Sanchez
Editór : Cancio Ximenes
