OEKUSI, 21 Maiu 2026 (TATOLI) – Marie Stopes Internasionál Timor-Leste (MSI-TL), serbisu hamutuk ho Institutu Nasionál Saúde Públiku Timor-Leste (INSP-TL), fasilita formasaun ba supervizór na’in-20 husi Ministériu Saúde (MS), kona-ba hadi’a kualidade planeamentu família iha Rejiaun Administrativa Espesiál Oekusi Ambenu (RAEOA).
Notísia relevante:Haforsa advokasia ba planeamentu família, RAEOA – Marie Stopes estabelese akordu
Country Diretóra MSI-TL, Maria Amelia Barreto, informa, formasaun durante loron lima, no formasaun ne’e, hetan apoia husi Governu Austrália liuhusi DFAT, atu fasilita formasaun kona-ba programa haforsa sistema saúde.
“Treinamentu ne’e, komesa ona hodi sertifika partisipante nasionál sira, hodi sai asesór ka ema ne’ebé maka nia ferramenta ba asismentu, atu hadi’a kontinua internál iha área planeamentu família. Formasaun ne’e, kobre área dokumentasaun, haree mós área kona-ba ema nia kompeténsia atu fornese serbisu planeamentu família, manajementu infeksaun, ikusliu kona-ba bainhira iha situasaun emerjénsia, atu responde oinsá,” nia hateten, iha salaun edukasaun Oekusi, foin lalais ne’e.
Nia esplika, formasaun ne’e pertinente atu adopta bazeia ba nesesidade Ministériu Saúde nian, tanba atendimentu ba programa planeamentu família ne’e, hala’o ona husi fornesedór saúde rasik, la’os husi MSITL.
Notísia relevante:Planeamentu familiár importante hodi redús númeru mortalidade materna iha Timor-Leste
Iha fatin hanesan, Diretora Nasionál Formasaun iha INSP-TL, Emelito Gomes, afirma, atividade importante atu atu aumenta koñesimentu no hasa’e kapasidade.
“Ko’alia kona-ba Supervisór, ne’e atu hadi’a kualidade ba planeamentu família, ida ne’e importante, tanba durante ne’e, Diresaun Formasaun husi INSPTL forma ona kuaze pesoal saúde mil ital, ne’ebé sai ona formadu ba iha planeamentu família,” nia hateten.
Tanba papél INSP-TL ne’e, atu forma ema ne’ebé iha kualidade, no integra ba sosiedade atu utiliza ho di’ak, tanba planeamentu família ne’e, pontu importante atu haree liu kona-ba oinsa maka atu fo asisténsia saúde ba inan no oan sira, entaun presiza atendimentu ho kualidade.
Jornalista: Abílio Elo Nini
Editór: Rafael Ximenes de A. Belo
