DILI, 27 Maiu 2026 (TATOLI)—Vise-Ministru Asuntu Parlamentár, Adérito Hugo da Costa, hateten Governu Konstitusionál da-sia (IX) la aumenta ho kualker adisonál (planu foun) ne’ebé mosu iha dalan klaran tanba asuntu auditória forense ba Ró Haksolok no aviaun ZEEMS iha hela prosesu legál nia laran.
Notísia Relevante: Governu halo analiza ba auditória forense ne’ebé implementa husi EY Portugál
Nia hatutan, prelemináriu ne’e aprezenta tiha ona iha Konsellu Ministru ne’ebé aprezenta direta husi Primeiru-Minkstru, Kay Rala Xanana Gusmão, kona-ba nesesidade atu submete relatóriu forense ró Haksolok, aviaun ZEEMS, inklui pontu seluk tan ba Ministériu Públiku.
“Relatóriu auditória forense Governu liuhusi Ministériu Finansa iha fulan kotuk ne’e submete tiha ona Ministériu Públiku hodi kompleta de’it prosesu ne’ebé la’o tiha ona,” Vise-Ministru informa ba jornalista sira iha Ministériu Finansa, Aitarak Laran, ohin.
Tanba ne’e, nia dehan, auditória ne’e halo no prosesu auditória ne’e halo ba buat hotu-hotu maibé klasifikasaun ba ona ba kanál legál ne’ebé Minsitériu Públiku prosesa hela iha tinan kotuk.
Prosesu auditóriu forense ne’e halo bazeia ba desizaun Konsellu Ministru iha 18 Marsu 2026, ne’ebé halo analiza konkluzaun ba auditória forense ne’ebé hala’o husi EY Portugál kona-ba prosesu akizisaun no jestaun aviaun Twin Otter nomós konstrusaun ró Haksolok, ne’ebé hala’o husi Autoridade Rejiaun Administrativa Espesiál Oekusi Ambenu.
Bazeia ba dokumentu ne’ebé Agência Tatoli asesu iha portál Governu haktuir katak, EY Portugál halo parte iha rede internasionál Ernst & Young, organizasaun servisu profisionál ida-neʼebé boot-liu iha mundu, ho esperiénsia hodi hala’o auditória ba entidade públika no privada sira.
Durante sorumutu ne’e, aprezenta diskrisaun ida kona-ba prosesu akizisaun, jestaun no konstrusaun ba ekipamentu sira-ne’ebé temi ona n mós konkluzaun prinsipál sira husi auditória forense.
Jornalista : Alexandra da Costa
Editór : Cancio Ximenes
