DILI, 26 Maiu 2026 (TATOLI) — Delegasaun Uniaun Europeia (UE) iha Timor-Leste ofisialmente lansa kampaña ida ho tema “Our Time / Ita Nia Tempu”, ho objetivu atu hamosu diálogu kona-ba realidade moris povu Timor-Leste nian no promove mudansa sosiál, protesaun ambientál, direitu sivíl inkluzivu no sustentabilidade iha país ne’e.
Lansamentu kampaña ne’e realiza iha Kampus IOB Manleuana, Fomento II, Comoro, Díli, iha segunda-kalan, ho hetan partisipasaun husi parseiru dezenvolvimentu, organizasaun sosiedade sivíl no juventude husi área oioin.
Iha nia intervensaun, Embaixadór Uniaun Europeia iha Timor-Leste, Thorsten Bargfrede, hateten katak kampaña “Ita Nia Tempu” la’ós kona-ba UE deit, maibé kona-ba povu Timor-Leste nia istória moris no oinsá bele hamutuk kontribui ba mudansa pozitivu iha nasaun ne’e.
“Hau fiar katak kampaña ida-ne’e la’ós kona-ba UE deit. Ida-ne’e kona-ba povu Timor-Leste nia istória moris no oinsá ita bele hamutuk kria mudansa pozitiva ba nasaun ida-ne’e,” dehan Thorsten Bargfrede.
Nia esplika katak durante fulan hirak tuir mai, kampaña ne’e sei la fó atensaun de’it ba estatístika ka projetu sira, maibé sei fó espasu ba istória moris povu Timor-Leste nian, hodi hatudu impaktu konkretu husi parseiria entre UE no Timor-Leste.
Tuir Bargfrede, kampaña “Our Time / Ita Nia Tempu” sei foka liu ba área prinsipál tolu, mak agrofloresta, direitu sivíl no konetividade.
Iha área agrofloresta, kampaña ne’e promove sistema agrikultura sustentável ne’ebé integra ai-horis, to’os no animal sira iha área ida, ho objetivu atu aumenta produsaun, proteje natureza, hadi’a fertilidade rai no hasa’e rendimentu agrikultór sira.
Ba direitu sivíl, kampaña ne’e sei fó atensaun ba partisipasaun públika no inkluzaun sosiál, inklui empoderamentu feto, protesaun ba labarik vulnerável sira, no apoiu ba programa edukasaun no interkâmbiu.
Enkuantu iha área konetividade, UE hakarak haforsa asesu povu nian ba servisu públiku, merkadu ekonomia, teknolojia dijitál no governasaun di’ak ne’ebé transparente no asesível ba ema hotu.
Iha lansamentu ne’e, UE mós introdús membru husi ekipa kampaña, inklui ativista ambientál Ego Lemos no Silvia Soares, ne’ebé sei envolve iha kampaña ne’e nu’udar voz públika iha área prioritária sira.
Ego Lemos agradese ba UE tanba konvida nia atu sai parte husi kampaña ne’e, liuliu atu fó kontribuisaun iha área agrofloresta no konservasaun bee-matan.
Nia dehan nia envolvimentu iha kampaña ne’e relevante tebes ho servisu ne’ebé durante ne’e hala’o husi Permatil, organizasaun ne’ebé ativa iha konservasaun bee-matan no plantasaun ai iha Timor-Leste tomak.
“Ami hakarak hasa’e konsiénsia komunidade nian atu kuda ai-horis barak liu tan hodi proteje bee no rai iha Timor-Leste,” dehan Ego Lemos.
Nia hatutan katak kampaña ne’e sei envolve juventude no estudante sira hodi hasa’e sira nia konsiénsia kona-ba importânsia protesaun ambientál.
Tuir nia, proteje ambiente la’ós responsabilidade ba grupu ida de’it, maibé sai nu’udar responsabilidade no dever morál ba sidadaun hotu-hotu iha Timor-Leste.
Jornalista: Camilio de Sousa
Editór: Filomeno Martins
