BOBONARU, 28 Maiu 2026 (TATOLI) – Xefe Suku Holsa, António Santa Cruz, husu ba Ministériu Juventude, Desportu, Arte no Kultura (MJDAK) atu reabilita kampu futeból Holsa ne’ebé dadaun aat no laiha infraestrutura adekuada atu apoia atividade desportiva iha área ne’e.
António Santa Cruz hatete katak sempre organiza atividade desportiva iha kampu ne’e, maibé to’o agora proposta atu hadi’a kampu seidauk hetan resposta husi ministériu kompetente.
Nia esplika katak kampu Holsa lokaliza besik Estádiu Malibaka no kampu Futeból Maliana, ne’ebé bele sai alternativa ba realizasaun eventu futeból nivel munisipál, postu, suku no eventu eskolár juventude no komunidade.
“Kampu ida-ne’e hale’u ho estádiu Malibaka no kampu Futeból Maliana. Kampu ida-ne’e ita bele deside hamutuk atu ajuda kampu rua ne’e hodi halo atividade iha Maliana. Ami esforsu hela ho forsa no kbiit ne’ebé iha más to’o agora seidauk hetan resposta husi parte kompetente”, António Santa Cruz dehan ba jornalista sira iha Maliana, ohin.
Komunidade José António de Jesus mós lamenta ho kampu ne’ebé dezde tempu Indonézia seidauk hetan reabilitasaun.
“Ami-nia kampu ne’e du’ut naruk, fatin tuur laiha, rai-haliis no lutu mós laiha. Dalaruma animál tama kampu laran bainhira ema sira joga hela”, nia hateten.
Administradór Postu Administrativu Maliana, Augusto Caetano, konfirma katak proposta atu hadi’a kampu Holsa no kampu Memo ne’e submete ona ba MJDAK.
“MJDAK fó ona matadalan mai, ha’u fó ona Memo mak atu halo uluk, maibé Memo seidauk lori proposta ida mai ha’u asina bazeia ba matadalan ne’ebé mai husi ministériu. Lahatene sira iha kapasidade atu halo sasán sira ne’e ka la’e. Atu hadi’ak ne’e la’os kompañia mak kaer, tenke kria grupu tiha mak ita hasa’e ba ministru aprova osan mai halo komunitáriu”, nia dehan.
Tanba ne’e, komunidade espera Governu bele responde lalais atu hadi’a infraestrutura desportiva iha suku Holsa, hodi promove atividade desportiva iha área Maliana.
Jornalista: Sergio da Cruz
Editora: Maria Auxiliadora
