DILI, 04 Juñu 2026 (TATOLI) – Sarani Dioseze Dili hamutuk ho Arsebispu Arkedioseze Metropolitana Dili, Don Virgílio Kardeál do Carmo da Silva, SDB, padre no madre sira, hala’o prosesaun ‘Corpo de Sangue de Cristo’ koñesidu ho ‘Corpo de Deus’ ho la’o-ain husi igreja Balide ba to’o iha jardín Na’in-feto Fátima, Lecidere-Dili, kinta semana ne’e.
Selebra loron 60 hafoin Páskua, Corpo de Deus hanesan solenidade ida ne’ebé importante liuhosi Igreja Katólika no mantén moris tradisaun sira ho sékulu barak iha rejiaun oioin nasaun nian.
Tradisaun sira Corpo de Deus nian bazeia ba elementu fundamentál tolu: selebrasaun misa solene nian, prosesaun santísimu sakramentu nian liuhosi dalan sira, no ornamentasaun rota sira ho ai-funan sira. Tradisaun ida ho abut medievál ne’ebé, durante sékulu barak, sai hanesan manifestasaun públika ida ne’ebé importante liu fiar nian.
Iha prosesaun ne’e, sarani sira ho entuazismu kanta, reza, hatudu devosaun no fé ba Nai Maromak, la’o to’o Lecidere hodi kontinua selebra misa eukarístia ne’ebé prezide husi Arsebispu, Don Virgílio Kardeál do Carmo da Silva.
Iha nia omília, Don Virgílio husu sarani sira konsagra Jezús nia futar isin no raan iha misa selebrasaun loron solenidade santísimu Corpo e Sangue de Cristo, tanba liuhusi Jezús nia isin halo ema sai ida de’it.
“Solenidade ohin, momentu importante tebes tanba ita hamutuk atu buka hakle’an liutan ita-nia fiar liuhusi eukarístia ne’ebé Jezús fó nia isin no raan hodi kontinua sustenta ita-nia moris atu iha fiel nafatin ba oin,” Arsebispu hateten.
Bispu Dioseze Dili ne’e dehan, Jezús mak paun moris husi Lalehan ema ne’ebé haan nia isin sei moris ba nafatin, ida-ne’e mak promesa ne’ebé nia fó mai sarani sira.
“Mai ita hamutuk selebra eukarístia ninia di’ak iha ita-nia moris. Jezús nia prezensa iha eukarístia sai ai-han no forsa mai ita buka nafatin Maromak loloos,” nia haklaken.
Kardeál hato’o parabéns tanba loron ohin ne’e sai hanesan tradisaun ida ba sarani katólika Timor-Leste ne’ebé kada tinan selebra loron ne’e no númeru sarani aumenta, ida-ne’e atu hatudu katak sarani nia fiar aumenta.
“Ita fiar katak iha Jezús nia isin de’it, mak bele transforma ita-nia hanoin, hahalok sira. Efetivu husi eukarístia mak ita rihun ba rihun maibé ho nia ita sai ida-ne’e, Kristu nia prezensa halo ita sai ida de’it,” nia katak.
Nia subliña, dalaruma nu’udar ema kriatura la’o dook husi realidade, ka Maromak nia hakarak, nune’e selebrasaun ohin ne’e konvida idaidak atu hanoin filafali ida-ne’e.
“Saida mak ita bele lori iha ita-nia moris liuhusi selebrasaun ohin ne’e konvida ita ne’ebé tuir Jezús tanba nesesidade duni katak presiza espiritualiddae oinsá atu hamriik metin,” Don Virgílio dehan.
Atu taka misa, Arsebispu mós fó mensajen katak Kristu mak we matan moris nian ne’ebé konvida sarani sira atu hakbesik ba nia, tanba nia mak paun moris nian, no rekoñese hanesan we matan espirituál ne’ebé bele transforma ema-nia prespetiva sira.
“Kristu hakarak konvida ita atu hakiak fiar, liuhusi komuñaun oinsá atu haforsa ita, bele guia ita, iha vontade la’o tuir Kristu nia hakarak sira,” nia konkui.
Iha fatin hanesan, sarani Mariano de Jesus, hateten nu’udar sarani katólika prosesaun ohin ne’e importante tebes tanba liuhusi Jezús nia isin mak bele fó kbiit ba isin lolon no klamar.
“Ita nu’udar sarani katólika Jezús nia isin mak bele fó forsa ita, tanba ita simu nia sai ida de’it ho ita,” nia dehan.
Jornalista: Arminda Fonseca
Editór: Evaristo Soares Martins
