DILI, 05 Juñu 2026 (TATOLI)—Governu liuhusi Sekretaria Estadu Komunikasaun Sosiál, hamutuk ho Federasaun Futeból Timor-Leste (FFTL), ETO Telko, no Rádiu Televizaun Timor-Leste, Empreza Públika (RTTL,E.P) sesta ne’e, realiza konferénsia imprensa hodi fó-sai kona-ba tranzmisaun direita Kopa Mundiál ne’ebé sei hahú iha 12-19 Juñu 2026.
Sekretáriu Estadu Komunikasaun Sosiál, Expedito Loro Dias Ximenes, hateten eventu ne’e importante tebes tanba durante fulan ida, atividade ka desportu kopa mundiál ne’e ema hotu bele asiste tranzmisaun direita husi ETO Telko nia kanál ne’ebé liuhusi mós RTTL,E.P, terrestrial ne’ebé RTTL ho ETO TELKO asina ona akordu.
“Entaun ami hamutuk iha-ne’e atu informa no konvida joven sira atu akompaña eventu desportivu ida-ne’’e, hodi aprende futebolista boot sira ne’ebé koñesidu iha mundu. Joven sira mós bele aprende esperiénsia tebe bola nian, ita labele hanesan sira maibé bele aprende buat balu durante jogu fulan ida-resin,” Expedito Dias Ximenes, hateten iha Otél Timor, sesta ne’e.
Nia dehan, Governu dezde uluk kedas hato’o agradese ba empreza ETO liuhusi ETO Telko ba serbisu hamutuk ida-ne’e tanba liuhusi kanál RTTL no liuhusi streaming ne’ebé sai husi ETO nia plataforma, ida-ne’e fasilita povu bele akompaña ho di’ak kopa mundiál ne’e.
“Ha’u lori Governu ida-ne’e nia naran konvida komunidade liuliu joven sira ne’ebé hadomi futeból atu bele akompaña iha ne’ebé de’it kria pás, domin durante jogu ne’e la’o,” nia husu.
Nia adianta, durante jogu la’o iha Dili, no munisípiu Governu mós sei haree fatin estratéjiku atu halibur ema haree hamutuk, oinsá kria fraternidade amizade entre joven sira no halo diskusaun bainhira jogu ne’e la’o.
Iha Dili, fatin sira ne’ebé sei halibur ema akompaña kopa mundiál mak hanesan iha Palásiu Prezidensiál nia oin, Sentru Konvensaun Dili, no seluk tan. No munisípiu sei haree fatin.
Iha fatin hanesan, Prezidente FFTL no na’in ba empreza ETO, Niton Gusmão, hateten lori FFTL nia naran, agradese ba Governu ne’ebé ho laran luak hodi bele apoiu atividade ne’ebé konsidera nu’udar espetákulu iha mundu, atu fó sai kopa mundiál 2026 iha Timor-Leste.
Tuir nia, eventu ida-ne’e nu’udar eventu desportiva boot liu iha mundu, ne’ebé mundu tomak tau matan kada tinan haat ema hotu hakarak sai sasin no asiste kampeaun foun kopa mundiál.
“Timor-Leste iha priviléjiu ida-ne’e hodi bele akompaña, eventu boot ida-ne’e liuhusi kanál abertu ita-nia Empreza Públika RTTL, atu ita-nia sosiedade, komunidade hotu bele asesu,” Nilton dehan.
Nia esplika, direitu transmisuan ne’e ETO Telko mak hetan liuhusi prosesu ne’ebé halo iha FIFA, nu’udar empreza ne’ebé iha direitu ba tranzmisaun hakarak partilla ho RTTL hanesan kanál públiku atu bele lori espetákulu mundiál ida-ne’e ba timoroan hotu iha ne’ebé de’it.
Nia akresenta, Futeból hanesan atividade ne’ebé atrai ema barak nia atensaun, timoroan iha pasaun boot ba futeból, iha Timór futeból nia dezenvolvimentu sei la’o neineik maibé nunka hamenus timoroan sira-nia paisaun ba atividade desportu ida-ne’e.
“Entaun lori FFTL, nia naran ha’u hakarak konvida timoroan hotu atu asiste eventu boot ida-ne’e, ho espíritu desportivu, tuur hamutuk hodi asiste, idaidak fó apoiu ba ninia nasaun ne’ebé hili no hadomi, maibé rezultadu manán ka lakon labele hafae ita, maibé ita hotu asiste haksolok no kria unidade,”nia dehan.
Iha biban ne’e hanesan mós Prezidente FFTL, nia parte husu ba pratikante deportu futeból iha Timor-Leste atu haree eventu ne’e hodi apriende buat barak liután hanesan tátika ka buat barak ne’ebé sei akontese durante jogu la’o.
Nune’e mós la’ós de’it pratikante desportu sira hanesan jogadór mak tenke fó atensaun barak liu maibé mós ba árbitru sira, tanba regra foun sira sei hamosu durante jogu ne’e.
Nia esplika, kopa mundiál tinan ne’e sei halo iha país tolu hanesan Estadu Unidu Amérika, Kanadá, no Mexiko.
Iha biban ne’e, Na’in ba Empreza ETO ne’e esplika kona-ba prosesu manán ba kanál tranzmisaun direita kopa mundiál.
Nilton hateten, prosesu ne’e liuhusi konkursu ne’ebé loke mundiál, Timór iha tinan barak ba kotuk la kompete, entaun instituisaun mídia balu husi rai-li’úr balu foti tiha deireitu Timór nia mak fa’an fali direitu ne’e mai Timór.
“Entaun antes 2018 ETO Telko depoizde eziste ita mós hahú aprosima direita instituisaun ne’ebé trata kona-ba direitu prockesting ami aprezenta ami-nia an dehan ami mós hakarak hetan transmizaun direita ne’e, entaun sira konsidera fó oportunidade ba ita, entaun kopa agora ne’e ami konfirma dezde iha 2018, tanba iha momentu ne’ebé ETO Telko konfirmandu no hetan lisensa”, dehan.
Nia haktuir, prosesu la’o to’o mai iha ne’e, ETO Telko formaliza de’it ninia prosesu atu bele hahú fó prockesting ne’e ba públiku timoroan hotu, maibé limita iha de’it rejiaun ne’e, entaun halo kooperasaun liuhusi SEKOMS partilla kustu fó sai husi kanál RTTL,E.P.
“Parilla kustu ne’e, la’ó Estadu de’it mak hasai osa ba hola direitu ne’e, maibé direitu ne’e ami hetan ho valór rihun $600, Governu kontribui de’it rihun $200 no ami hasai rihun $400, ida-ne’e la’ós ami ba manán mai faan hetan fali osan husi Estadu ne’e lae, maibé nia objetivu la’ós puramente negósiu, maibé ita halo ne’e objetivu responsabilidade sosiál korporativu, ida-ne’e ami mós iha responsabilidade ba sosiedade katak saida mak mai bele halo, ami bele kontribui,” nia konklui.
Jornalista: Arminda Fonseca
Editór: Evaristo Soares Martins
