DILI, 19 Juñu 2026 (TATOLI)—Komandante Polísia Nasionál Timor-Leste (PNTL), Komisáriu Asistente Polísia Afonso dos Santos hato’o ba Ministru Interiór, Francisco da Costa Guterres, katak membru na’in-200 tinan oin sei pasa ba reforma.
“Ha’u seidauk fiksa nia númeru hira mas iha enkontru orbainhira Komandu Jerál informa mai ha’u, katak sei halo preparativu ba ida-ne’e. Ita iha pesoál Polísia na’in-200 resin sei reforma tinan oin,” Ministru Interiór informa ba Jornalista sira hafoin partisipa iha enkontru Konsellu Ministru estraordinária iha Ministériu Finansa, Sesta ne’e.
Nia dehan, tuir loloos membru na’in-158 pasa ona ba reforma iha tinan kotuk, maibé tuir Estatutu PNTL ne’ebé halo alterasaun iha tinan 2024, katak presiza tinan-rua tan mak impleta lei, nune’e iha tinan 2027 Governu tenke implementa ona hodi halo reforma ba membru sira ne’ebé tama ba idade reforma.
“Ida-ne’e mak diskusaun la’o hela, Komandu sei haree filafali prosesu ne’e, mas o que certo sira bá reforma ho di’ak, katak sira fila bá komunidade mós pelu menus sira iha situasaun di’ak,” nia akresenta.
Notísia relevante : Governu prefere tinan ne’e reforma dahuluk membru PNTL ho moras prolongada
Governante ne’e hatutan, Governu hakarak membru Polísia sira tenke mantein sira-nia ligasaun di’ak ho Polísia rasik.
“Sira sei reforma iha tinan 2027 agora, ne’e ita komesa implementa reforma dignu ne’e ba sira. Ne’e sira ba hotu bele to’o 200-resin,” nia relata.
Ministru klarifika, reforma ne’e la’ós atu hasai membru Polísia sira husi sira-nia instituisaun, maibé kestaun idade avansada no sukat ba kbiit katak tempu ona ba reforma hodi fó fali oportunidade ba jerasaun foun.
“Komandu kontinua nafatin tau-matan hela ba sira to’o iha orsamentu oituan para hetan uma dignu, uma di’ak, fatin ne’ebé di’ak atubele deskansa hodi selu sira-nia reforma para sira kontribui nafatin ba ita-nia dezenvolvimentu nasionál liuliu estabilidade nasionál,” Governante katak.
Jornalista : Natalino Costa
Editora : Julia Chatarina
