DIL, 20 Juñu 2026 (TATOLI)–Estadu Unidu Amérika (EUA) susesu iha jogu daruak grupu D, hafoin halakon adversáriu Austrália ho rezultadu 2-0 no asegura kedan fatin iha jornada 32 Kopa Mundiál FIFA 2026.
Jogu ne’ebé maka hala’o iha Estádiu Lumen Field iha Seattle, iha Sábadu madrugada oras Timor-Leste nian, sai hanesan pasu krusiál ida ba ekipa uma-na’in hodi avansa ba faze eliminatória.
Desde hahú jogu, EUA joga ho fiar-an no fó presaun ba Austrália. Nu’udar rezultadu, ekipa ho apelidu The Stars and Stripes konsege lidera iha minutu 11. Golu dahuluk hosi EUA mai husi autogolu ne’ebé prodús rasik husi defeza australianu Cameron Burgess.
Lidera ho golu ida fó kontrolu liután ba EUA hodi mantein jogu no kontra-atake sai manas liután.
Notísia relevante : Korea Súl derrota 0-1 kontra Méxiku iha Kopa Mundiál 2026
Australia la nonok, responde ho kontra atake, maibé esfirsu sira hela de’it hanesan esforsu tanba molok intervalu, EUA responde jogu furak hodi aumenta sira-nia vantajen liuhusi jogadór Alex Freeman iha minutu 43.
Golu ida-ne’e mak konklui parte dahuluk no halo EUA hetan vantajen 2-0 iha intervalu.
Tama ba parte daruak, Austrália hatudu resposta ne’ebé maka’as. Socceroos sira hala’o jogu ida ne’ebé maka agresivu liu hodi aumenta sira-nia intensidade atake nian hodi koko atu ultrapasa defeza Estadu Unidu maibé la konsege tanba defeza Estadu Unidu metin hanesan moru berlin.
Atake sira, liuliu liuhusi jogadór lina karuk no loos sira. Sira kria oportunidade perigozu oioin ba defeza Estadu Unidu nian.
Maibé, finalizasaun mak problema prinsipál Austrália nian. Sira la konsege konverte oportunidade oioin ne’ebé bele kria ba golu.
Defeza disiplinadu Estadu Unidu nian mós impede esforsu ekipa adversáriu nian durante parte daruak tomak.
Austrália kontinua halo presaun to’o minutu ikus jogu nian. Maibé, sira la konsege hatama golu ida hodi hamenus defisit. Apitu finál huu, ho eskoru ne’ebé mantein 2-0 a favor Estadu Unidu nian.
Vitória ida-ne’e fó ba Estadu Unidu pontu neen, ne’ebé sufisiente hodi asegura fatin ida iha jogu 32 hosi Kopa Mundiál 2026 nian.
Entretantu, Austrália tenke luta maka’as liután iha sira nia jogu tuir mai hodi mantein sira-nia posibilidade atu hakat ba faze eliminatória.
EUA: (4-2-3-1)
Matt Freese, Alex Freeman, Chris Richards, Tim Ream (Kapitaun), Antonee Robinson, Tyler Adams, Weston McKennie, Malik Tillman, Sergiño Dest, Ricardo Pepi, Folarin Balogun
Austrália: (5-4-1)
Patrick Beach, Jacob Italiano, Alessandro Circati, Harry Souttar (Kapitaun), Cameron Burgess, Jordan Bos, Mathew Leckie, Aiden O’Neill, Paul Okon-Engstler, Nishan Velupillay, Mohamed Touré.
Jornalista : Hortêncio Sanchez
Editora : Julia Chatarina
