BOBONARU, 20 Juñu 2026 (TATOLI)–Institutu Jestaun Ekipamentu no Apoiu Dezenvolvimentu Infraestrura (IGEADI), Brigada Maria-Tapo, normaliza ona estrada hahú husi área Buipira, Suku Lahomea, Postu Administrativu Maliana liga ba Postu Administrativu Bobonaru, Munisípiu Bobonaru, ne’ebé hetan estragu tanba udan-boot foin lalais ne’e.
Intervensaun ne’e hodi fasilita movimentasaun transporte públiku no ema ba atividade ekonómika, saúde no asuntu sosiál sira seluk iha tempu bailoro.
Abitante Bobonaru, Luciano Lopes, hateten, presiza duni intervensaun husi IGEADI tanba pontu balun ameasadu atu kotu totál.
“Ami kontente tanba IGEADI bele mai aterru estrada koak sira ne’e, hadi’a dalan sira atu kotu hanesan iha Galusapulu nia Pintu Gerbang Odomau mós besik kotu ona, tanba ida-ne’e hela sorin de’it atu kotu totál, espera semana ida-ne’e nia laran institutu bele hadi’a hotu to’o bá Bobonaru para ami bá merkadu, halo saida de’it bele la’o ho di’ak,” Luciano ható ba Ajénsia TATOLI iha Galusapulu, Sábadu ne’e.
Notísia relevante: Komunidade husu IGEADI normaliza estrada iha Odomau
Aleinde ne’e, Motorista, Juvinal Gomes da Silva, husu Governu atu tau prioridade ba estrada ne’e iha orsamentu tinan fiskál 2027 tanba kada tinan IGEADI normaliza maibé la permanente, nune’e bainhira akontese dezastre naturál sempre afeta ba movimentasaun.
“Ami hanoin IGEADI nia serbisu mak ida-ne’e duni, maibé di’ak liu Governu halo lalais uitoan ninia prosesu, hodi tau tia aspál ka oinsá, se lae bainhira udan mai sobu filafali, ita gasta osan de’it, ami triste tanba tinan 20-resin ona ami la’o iha fatuk-laran, tahu-laran, tempu bailoro fali mós ami han rai-rahun husi Maliana to’o Bobonaru, se bele Governu tau-matan netik ba,” nia katak.
Estrada referida liga mós ba Postu Administrativu Lolotoe (Bobonaru), Postu Administrativu Atsabe (Ermera) no Postu Administrativu Zumalai, Munisípiu Kovalima inklui Munisípiu Ainaru.
Antes ne’e, iha tinan 2017 Governu liuhusi Ministériu Transporte no Komunikasaun kontrata empreza lokál, Vieramor Unipessoal, Lda hodi halo manutesaun estrada hahú husi Buipira, Suku Lahome, Postu Administrativu Maliana liga bá Postu Administrativu Bobonaru ho kustu millaun $2-resin, ne’ebé projetu ho karater emerjénsia ne’e to’o agora seidauk finaliza no paradu hela, tanba ne’e Governu liuhusi ministériu responsável projetu sei halo revizaun ba dezeñu no Bill of Quantities (BoQ).
Jornalista : Sérgio da Cruz
Editora : Julia Chatarina
