KOVALIMA, 21 Juñu 2026(TATOLI)–Komisaun Jestaun Risku Dezastre Naturál konsege evakua abitante hamutuk 368 husi uma-kain 118 ne’ebé sai vítima ba inundasaun iha Aldeia Akar Laran, Suku Suai Loro, Postu Administrativu Suai, Munisípiu Kovalima.
Komisaun ne’e kompostu husi Servisu Munisipál Jestaun Risku Dezastre Natutál, Autoridade Protesaun Sivíl (APC, sigla portugéz), Cruz Vermela Timor-Leste (CVTL), Servisu Saúde Munisípiu Kovalima, Polísia Nasionál Timor-Leste (PNTL) no Sentru Solidariedade Sosiál no Inkluzaun Munisípiu Kovalima.
Komandante APC Kovalima, Celestino Afonso Ferreira, esplika, evakuasaun bá Sentru Evakuasaun iha Eskola Sekundáriu Jerál Públiku Suai ne’e tanba udan-boot ne’ebé akontese iha loron 19 Juñu.
“Relasiona ho udan-boot ne’ebé akontese halo bee mota Lokeu, Bekusa no Tafara ho volume boot hodi lori dezastre ba komunidade sai vítima,” Komandante APC Kovalima, Celestino Afonso Ferreira, informa ba Ajénsia TATOLI, Domingu ne’e.
Notísia relevante : Autoridade Kovalima halo levantamentu dadus ba komunidade afetadu inundasaun
Celestino Afonso dehan, presiza halo normalizasaun bee dalan nune’e kada tinan labele mosu inundasaun iha Aldeia Akar.
“Se lae kada tinan sempre akontese hela de’it inundasaun nune’e tenke evakua komunidade mai iha sentru evakuasaun. Autoridade seidauk fó apoiu emerjénsia ba vítima dezastre sira tanba sei foku hodi akompaña vítima sira iha Sentru Evakuasaun hafoin bele fó apoiu emerjénsia ai-han no la’ós ai-han,” nia tenik.
Jornalista : Celestina Teles
Editora : Julia Chatarina
