BOBONARU, 22 Juñu 2026 (TATOLI) – Institutu Nasionál Administrasaun Públika (INAP) hahú formasaun administrativa ba funsionáriu no dirijente munisipál sira iha munisípiu Bobonaru ho objetivu mak hasa’e kapasidade rekursu umanu hodi prepara kondisaun ba implementasaun desentralizasaun dministrativa no poder lokál.
Matéria prinsipál ne’ebé sei aborda durante formasaun mak administrasaun, finansa, rekursu umanu, lideransa no área relevante seluk ne’ebé importante ba jestaun governasaun lokál.
Vise-Ministru Administrasaun Estatál, Jacinto Rigoberto, iha abertura atividade ne’e, apresia no louva inisiativa INAP nian tanba konsidera importante atu apoia imlementasaun programa prioridade IX Governu Konstitusionál nian kona-ba desentralizasaun no poder lokál.
Notísia relevante: Bobonaru rejista avansu infraestrutura no hein podér lokál
“Prosesu desentralizasaun no podér lokál durante ne’e halo ona avaliasaun barak. Rezultadu avaliasaun hatudu katak Bobonaru hetan klasifikasaun ‘Muito Bom’, maibé ne’e la signifika katak atribuisaun podér lokál sei halo kedas. Governu sei kontinua haree preparasaun no rekezitu sira molok foti desizaun final”, nia dehan iha intervensaun ba atividade ne’ebé realiza iha salaun Maria Tapó, segunda-feira ne’e.
Nia hateten katak maski munisípiu sira hatudu ona vontade no progresu di’ak iha preparasaun ba ukun-an lokál, sei iha aspetu balun ne’ebé presiza hadi’a tan atu responde ba nesesidade no rekizitu desentralizasaun.
Tanba ne’e, nia husu ba partisipante sira atu dedika tempu no partisipa ativamente iha formasaun ne’e hodi hasa’e koñesimentu no kapasidade profisionál. “Tanba ida-ne’e importante la halimar, husu ba formandu sira tenke dedika imi tempu, konsentrasaun, imi-nia partisipasaun halo di’ak, ativu para bele enrikese tan imi-nia koñsimentu, imi-nia kbiit para to’o tempu ne’ebé Governu sentrál deside katak Bobonaru prontu ona atu ba, imi mós preparadu di’ak ona”, nia dehan.
Iha oportunidade hanesan, Diretór-Jerál INAP, Policarpo Amílcar Boavida, esklarese objetivu husi formasaun ne’e mak atu hadi’a dezempeñu no prestasaun servisu públiku, liuliu ba lideransa instituisaun sira.
Aleinde ne’e, formasaun ne’e mós atu fortalese jestaun lideransa no promove etika profesional iha servisu públiku.
Nia akresenta katak INAP kontinua fó apoiu tékniku no formasaun ba munisípiu 13 no RAEOA bazeia ba rezultadu avaliasaun kona-ba kondisaun minima atu simu podér lokál ne’ebé preziza hadi’ak rekomendasaun no frajilidade sira.
“Iha limitasaun balun no iha mós rekomendasaun balu ne’ebé ita tenke antesipa ba iha ne’ebá. Entaun, iha aproximasaun rua, ida ita ba ho asisténsia téknika, ida ita liuhusi formasaun. INAP hanesan instituisaun ne’ebé agora tutela indireta iha MAE, ami mós hola parte iha ne’e. para fó susesu ba politika Governu nian”, dehan.
Prezidente Autoridade Munisípiu Bobonaru, Paulo Moniz Maia, mos afirma katak administrasaun munisipál kontinua prepara-an iha área oioin, li-liu administrasaun, finansa no jestaun, nune’e bainhira Governu sentrál deside implementa poder lokál, munisípiu ne’e prontu ona atu hala’o knaar ho di’ak.
Nia subliña katak desentralizasaun importante tebes tanba durante ne’e podér, administrasaun no orsamentu barak sentraliza iha nivel nasionál. “Ho preparasaun no formasaun ne’ebé kontinua hala’o, munisípiu Bobonaru espera bele aumenta kapasidade atu fó servisu di’ak liu ba komunidade no hadi’a moris povu nian iha futuru”, katak.
Formasaun ne’e hala’o durante loron lima ba Administradór Postu Administrativu neen no kargu xefia sira iha Autoridade Munisípiu Bobonaru.
Notísia relevante: Xanana: Bobonaru-oan tenke ho lema “SAMBOKER” hodi simu podér lokál
Jornalista: Sergio da Cruz
Editora: Maria Auxiliadora
