BOBONARU, 23 Juñu 2026 (TATOLI) – Ministériu Obra Públika (MOP) presiza implementa projetu reabilitasaun estrada rurál kilómetru rua iha aldeia Vila Maria liga bá Rairobo, suku Rairobo, postu administrativu Atabae, munisípiu Bobonaru, hodi fasilita movimentasaun públika, liuliu asesu bá merkadu no atividade sosiál sira seluk.
Membru komunidade Rairobo Maria Helena Soares lamenta tanba estrada ne’e la tutan ho projetu reabilitasaun estrada ne’ebé antes ne’e implementa ona.
Notísia relevante: Projetu estrada rurál kilómetru 18,45 iha Bobonaru hahú implementa
“[Estrada] iha karik ho ida leten ne’e hotu ona. Agora, kilómetru rua ne’e klaran ne’e mak la halo, husik hela aat hanesan ne’e. Ha’u atu husu ba Governu se bele haree ami-nia dalan ne’e para halo hanesan fatin seluk-seluk nian. Tanba ami mós presiza tebetebes sira-nia produtu lokál ne’e lori bá iha merkadu no mós tempu udan ne’e dalan ne’e ladi’ak”, nia realsa.
Xefe Suku Rairobo, Pedro Leitão, dehan problema ne’e nia parte hato’o ona ba Diretór-Jerál Obra Públika no Ministru Samuel Marçal atu buka meiu hodi solusiona.
Pedro Leitão fiar katak Governu sei halais prosesu rekonkursu ba estrada referida hodi responde povu nia preokupasaun.
Totál komunidade benifisiariu ba estrada ne’e hamutuk uma-kain 200-resin.
Problema bee-moos iha Rairobo
Komunidade Helena Maria mós lamenta kona-ba problema falta bee-moos ne’ebé kada tinan sempre akontese iha tempu bailoro.
“Agora sei di’ak, maibé kuandu tama ba Jullu-Outubru ne’e bee susar, liuliu ba oan sira eskola ne’e. Depois ita akumula labarik barabarak entaun difisíl tebetebes ba kaza de bañu no mós sira hetan merenda eskolár ne’e dalaruma koziñeira sira mós buka bee”, nia dehan.
Xefe Suku Rairobo, Pedro Leitão, reforsa katak problema ne’e akontese tanba débitu bee menus. “Ita nia bee-moos ne’e kanaliza nanis iha tempu Portugés nia kedas, mai tempu Indonézia nia mós ema sobu pipa, ne’e mak dalaruma bee ne’e ba sai uitoan de’it”, nia dehan.
Nia relata katak iha tempu bee-maran komunidade sira obrigatóriu tenke la’o ain ho distánsia dook hodi bá kuru iha bee-matan antigu ida. “Sira la’o tun kala kilómetru ida. Madrugada tuku 04h00 sira hadau malu bá kuru bee, depo’is dadersán mak sira lalin mai uma”, nia salienta.
Atu solusiona probmema bee-moos, organizasaun naun-governamentál internsionál ida halo ona mapeamentu hodi bele dezeña fatin bee-matan lulik iha Rairobo.
Notisia relevante: SMASA-parseiru sira buka solusaun ba problema bee-moos iha Bobonaru
Jorlanista: Sergio da Cruz
Editora: Maria Auxiliadora
