DILI, 24 Juñu 2026 (TATOLI)–Primeiru-Ministru Interinu, Mariano Assanami Sabino simu orientasaun hosi Primeiru-Ministru (PM), Kay Rala Xanana Gusmão atu haloot Antigu Prezidente Repúblika, Francisco Guterres Lú Olo hanesan eroi ho dignu.
“Nu’udár Primieru-Ministru Interinu, sei asegura Primeiru-Ministru nia orientasaun ne’e,” Assanami dehan ba jornalista sira iha rezidénsia Saudozu Lú Olo, Faról, Kuarta ne’e.
Nia haktuir katak nia hatene ona modelu atu haloot Saudozu Lú Olo oinsá tanba esperiénsia maka iha tempu liubá haloot Proklamadór Francisco Xavier do Amaral no Saudozu José António da Costa “Ma’Huno” no Saudozu La-Sama.
“Primieru Ministru iha hela Portugál. Ha’u nu’udár Primeiru-Ministru Interinu iha responsabilidade maka informa prosesu ne’e loron-loron ba PM Xanana dezde ita-nia Saudozu Francisco Guterres Lu-Olo hakotu iis,” Assanami haktuir.
Atividade ofisiál iha Primeiru Ministru, Kay Rala Xanana Gusmão nian iha Lisboa Portugál determinadu hotu ona, no halo ona koordenasaun antes, ne’ebé PM Xanana sei la partisipa Saudozu Francisco Guterres Lú Olo nia funerál iha Jardin Eroi Metinaru, tanba sei to’o fali Timor-Leste iha 29 Juñu tinan ne’e.
“Más nu’udár Primeiru Ministru Interinu ha’u informa tiha ona ba Primieru Ministru, Kay Rala Xanana katak sei haloot Saudozu Francisco Guterres Lú Olo iha 26 Juñu tinan ne’e,” nia informa.
Jornalista: Osória Marques
Editór: Xisto Freitas da Piedade
