DILI, 25 Juñu 2026 (TATOLI)—Selesaun Nasionál Suisa hasees Kanadá 2-1 iha jogu ikus faze grupu Kopa Mundiál 2026 ba inklina an iha jornada 32, iha Estádiu Vancouver, Kinta (25 Jñu 2026) madrugada oras Timor-Leste.
Primeira parte husi jogu Suisa-Kanadá sai hanesan kompetisaun ida-ne’ebé maka’as. Ekipa rua troka atake, hodi husik guarda-rede adversáriu sira luta atu asegura sira-nia baliza ne’ebé di’ak.
Maske jogu la’o iha intensiade ne’ebé aas durante primeira parte, maibé ekipa rua sólidu hodi la rezulta golu no termina jogu iha primeira parte ho rezulatdu 0-0.
Tama ba segunda parte, jogu ne’ebé la’o ho intensiade, Suisa ataka kedas Kanadá iha inísiu. Ruben Vargas lori Suisa lidera uluk ho golu 1-0 iha minutu 46, hafoin Vargas konverte Johan Manzambi nia kruzamentu husi sorin-loos ho suta husi ain-loos ho distánsia besik lori Suisa lidera jogu.
Suisa aumenta golu ba 2-0 iha minutu 67 ho golu husi Johan Manzambi. Jogadór sira aproveita fallansu ida iha defeza Kanadá nian.
Golu ne’e mai husi Luqa Jaquez, ne’ebé joga bola iha defeza Kanadá nia kotuk. Bola ne’e simu ho di’ak husi Breel Embolo, ne’ebé halo defeza kanadianu sai dezorganizadu.
Jogadór Embolo depois pasa ba Manzambi, ne’ebé halai uitoan ba loos. Husi área penalti nia laran, Manzambi lansa suta ida ho ain-loos. Bola ne’e tama liu rede laran.
Maske sofre ona golu rua, Kanadá la nonok, sira tenta husi kontra-atake, pasa bola husi ain ba ain, ikus hamenus duni sira nia sofrimentu. Iha minutu 76 liuhusi jogadór substitutu Promise David konsege fura rede Suisa hodi muda rezultadu ba 2-1.
Kanadá kontinua sai ameasa sériu ba Suisa, hodi kapitaliza pasajen naruk sira hodi kria oportunidade. Maske nune’e, Tanitoluwa Oluwaseyi nia esforsu iha minutu 79 la iha sorte, tanba nia kabesa ne’e la’o dook hosi trave baliza nian.
Iha minutu 90+1, jogadór Derek Cornelius lakon oportunidade ida ba Kanadá atu halo empata. Cornelius hasoru kruzamentu ida ne’ebé maka halakon guarda-rede Gregor Kobel, maibé nia kabesa ho distánsia besik sai dook hosi rede Suisa nian.
Vitoria ne’e lori Suisa hetan ona pontu hitu husi joga dala tolu, enkuantu Kanadá hetan de’it pontu haat. Bósnia ho Qatar sei hala’o jogu bainhira Bósnia manán mak dudu ses Kanadá no nia mak avansa ba jornada 32.
Jogadór Suisa
Gregor Kobel; Luca Jaquez, Nico Elvedi, Manuel Akanji, Ricardo Rodriguez; Granit Xhaka, Remo Freuler; Johan Manzambi, Djibril Sow, Ruben Vargas; Breel Embolo.
Jogadór Kanadá
Maxime Crepeau; Alistair Johnston, Derek Cornelius, Luc De Fougerolles, Richie Laryea; Tajon Buchanan, Mathieu Choiniere, Nathan Lintasa, Ali Ahmed; Cyle Larin, Jonathan David.
Jornalista : Hortêncio Sanchez
Editór : Cancio Ximenes
