DILI, 25 Juñu 2026 (TATOLI)-Méxiku taka sira nia jogu ikus Grupu A ho vitória. El Tri halakon Repúblika Xeka 3-0. Rezultadu ida-ne’e hametin dominasaun Méxiku nian iha faze grupu A, Kopa Mundiál 2026.
Entretantu, Repúblika Xeka hetan eliminasaun hafoin la konsege asegura vitória no hetan de’it pontu ida iha ronde kualifikasaun nian.
Jogu entre Repúblika Xeka no Méxiku realiza iha Estádiu Sidade Méxiku iha Kinta meiudia oras Timor-Leste nian.
Ekipa rua ne’e hala’o jogu ne’ebé maka’as hahú kedas iha inísiu. Maibé, sira nia atake sira nafatin la fó rezultadu.
Repúblika Xeka, dezesperadu ba vitória, joga ho agresivu liu. Jogadór Denis Visinsky iha oportunidade, maibé suta ne’ebé nia halo sai dook husi baliza.
Intensidade jogu nian aumenta hafoin Pauza Hidratasaun nian. Maibé, defeza sólidu hosi ekipa rua ne’e halo jogu ne’e metin, lahó ameasa loloos ne’ebé maka kria.
Iha minutu 39, Méxiku ameasa liuhosi Jorge Sanchez. Maski nune’e, nia suta ho distánsia besik hetan salva husi guarda-rede Checo Matej Kovar.
Hafoin ne’e, ekipa rua koko sira nia sorte ho suta sira ho distánsia dook liután hosi área penalidade nia liur. Maibé, sira nia tentativa sira la konsege hetan nafatin alvu.
Tempu jogu nian la muda hafoin intervalu. Ekipa rua ne’e kontinua tenta hodi hatama golu dahuluk.
Ikus mai México hetan vantajen 1-0 liu husi golu ne’ebé marka husi M. Cavez iha minutu 55. Hahú hosi kontra-atake lalais, Chavez nia halai mesak hetan frustrasaun hosi defeza xeka. Chavez, halai sees hosi nia markadór, hafoin ne’e ho susesu liu guarda-rede xeku Matej Kovar. Eskoru 1-0 ba Méxiku.
Liutiha minutu neen, ekipa uma-na’in duplika sira nia vantajen ba 2-0 liuhosi Julian Quinonez. Jogadór númeru 16 ne’e konsege fura rede hafoin defeza xeku T. Holes halo sala bainhira hasai bola iha área penalidade.
Xeku sira koko atu luta hasoru golu rua iha kraik. Xeku sira ameasa liuhosi Doudera, maibé nia suta aas liu.
Hafoin Hydration Break, Méxiku halo mudansa barak, inklui lori guarda-rede foun Guillermo Ochoa ba Raul Rangel.
Méxiku aumenta sira nia vantajen ba 3-0 liuhosi suta A. Fidalgo nian. Iha jogu nia rohan, eskoru mantein 3-0 ba Méxiku.
Checo (3-4-2-1):
Matej Kovar; Ladislav Krejci, Robin Hranac, Tomas Holes; David Doudera, Lukas Cerv, Michal Sadilek, Vladimir Coufal; Denis Visinsky, Pavel Sulc; Adam Hlozek.
Treinadór: Miroslav Koubek.
Méxiku (4-1-4-1):
Raul Rangel; Mateo Chavez, Cesar Montes, Israel Reyes, Jorge Sanchez; Luis Romo; Edson Alvarez, Gilberto Mora, Julian Quinones, Guillermo Martinez; Roberto Alvarado.
Treinadór: Javier Aguirre.
Jornalista : Hortêncio Sanchez
Editór : Cancio Ximenes
