BOBONARU, 25 Juñu 2026 (TATOLI) – Sekretáriu-Jerál Asosiasaun Futeból Bobonaru (AFB), Rosalino Loe Leso, hateten katak atmosfera Kopa Mundiál ne’ebé dada atensaun komunidade durante fulan ida nia laran sai fonte inspirasaun ba dezenvolvimentu jogadór timoroan sira, liuliu iha munisípiu Bobonaru.
Rosalino dehan entuziasmu komunidade ba eventu futeból mundial ne’e fó oportunidade ba adeptu no jogadór sira atu aprende liután kona-ba maneira joga futeból no regra sira ne’ebé aplika tuir padraun FIFA.
“Ho Kopa Mundiál ne’e, jogadór sira bele aprende oinsá atu joga di’ak liután no komprende regra sira ne’ebé aplika iha kompetisaun internasionál. Ida-ne’e bele hamosu sira-nia vontade no inspira sira atu prepara-an ba futuru”, Rosalino dehan ba Tatoli, iha kampu Futeból Holsa, kuarta ne’e.
Notísia relevante: Autoridade Bobonaru alerta ba joven sira akompaña Kopa Mundiál ho disiplina
Nia akrexenta katak maioria jogadór sira iha Bobonaru mai husi kontestu ne’ebé seidauk komprende didi’ak regra futeból nian. Tanba ne’e, observasaun ba jogu sira iha Kopa Mundiál bele aumenta sira-nia koñesimentu no ajuda reforsa kapasidade teknika no tátika.
“Ita la espera entre jogadór iha Bobonaru aban-bainrua bele joga iha eventu nivel internasional ho Kopa Mundiál ne’e sira-nia koñsimentu bele di’ak liután. Kada jogadór ne’ebé mai ho nia background ladún hatene regra, husi ida-ne’e maski ita la taka matan oinsá atu reforsa sira-nia kapasidade”, nia dehan.
Iha parte seluk, Prezidente Autoridade Munisípiu Bobonaru, Paulo Moniz Maia, hateten katak maioria adeptu futeból iha Timor-Leste, inklui iha Bobonaru, demonstra entuziasmu ba Kopa Mundiál.
Nia dehan autoridade munisípiu instala ona ekran iha Kampu Futeból Maliana atu fasilita komunidade akompaña kompetisaun ne’e, maibé husu adeptu sira atu mantén orden no trankuilidade públika.
“Ami fó ona mensajen ba komunidade atu asiste jogu ho hakmatek, labele halo perturbasaun ba ema seluk, se ó-nia euipa favóritu manán, simu ho alegria, no se lakon mós tenke simu mós ho desportivizmu, maibé situasaun jeralmente iha Bobonaru la ho di’ak”, Paulo dehan.
Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, mós husu komunidade atu respeita bandeira nasaun sira ne’ebé uza durante períodu Kopa Mundiál.
Nia enfatiza katak adeptu sira labele estraga ka so’e bandeira ekipa ka nasaun seluk nian maski sente dezapontadu ho rezultadu jogu. “Eventu ida-ne’e atu anima no inspira ita hotu, liuliu ita-nia jogadór sira. Tanba ne’e, tenke iha responsabilidade no respeitu ba malu” nia dehan.
Julio mós fó hanoin katak komunidade tenke valoriza no respeita bandeira Timor-Leste, tanba símbolu ida-ne’e hetan liuhusi luta naruk husi eroi no patriota sira.
“Bele hasa’e bandeira nasaun seluk nia, maibé labele aas liu ita-nia bandeira RDTL, tanba ita nasaun ida bandeira ita mak tenke a’s liu bandeira hotu-hotu”, nia afirma.
Membru komunidade Maliana, Fernando Pinto, hateten atmosfera Kopa Mundiál tinan ida ne’e kontinua fó ksolok ba adeptu sira. Maibé, provizóriu komunidade deside redús atividade selebrasaun hanesan hakilar, haklalak no hasai bandeira iha karerta no motorizada sira hanesan forma respeitu ba falesimentu eis-Prezidente Repúblika, Francisco Guterres “Lú-Olo”.
“Horibainrua ho horisehik Arjentina manán, Portugál mós manán tán, ema nonton hotu idaidak fila bá uma toba, tanba ita-nia líder mak mate. Depois hakoi tiha semana oin sira ne’e ita foin bele asiste ho kontente, maibé labele demais liu”, nia dehan.
Notísia relevante: Kolombia avansa ba faze 32 Kopa Mundiál hafoin halakon Kongo 1-0
Jornalista: Sergio da Cruz
Editora: Maria Auxiliadora
