DILI, 25 Juñu 2026 (TATOLI)–Portavós Polísia Nasionál Timor-Leste (PNTL), Superintendente Xefe Polísia João Belo dos Reis, konfirma katak informasaun ne’ebé sai ba públiku katak Ajente Polísia feto ida ho inisiál EPLM mate hafoin tiru nia-an iha área Matadoru, Dili, ne’e loos, nune’e daudaun ekipa responsável sira halo hela investigasaun no hein rezultadu atu hatene loloos sirkunstánsia no motivu husi akontesimentu ne’e.
Portavós PNTL informa, Sentru Operasaun PNTL simu informasaun kona-ba insidente ne’e iha tuku 21:30 kalan iha loron 24 Juñu 2026.
“Tuir informasaun preliminár sira ne’ebé ami rekolla ona, Ajente ne’e deskonfia halo tiru ba nia-an rasik, rezulta iha kanek grave tebes. Família husu kedas ambulánsia no vítima transporta ho urjénsia ba Ospitál Nasionál Guido Valadares,” João Belo dos Reis, hateten.
Nia dehan, maski ekipa médiku sira halo esforsu tomak atu salva nia moris, maibé labele tanba sofre emorajia maka’as tanba kilat tiru to’o iha parte kakutak.
Notísia relevante : Komandu seidauk hatene loloos motivu membru UPF tiru-an iha Nunura Bobonaru
“Infelizmente, ekipa médiku labele salva moris Ajente ne’e. Daudaun isin-mate hela iha Ospitál Nasionál Guido Valadares atu hein halo autópsia, tanba prosedimentu ida-ne’e obrigatóriu no importante atu klarifika faktu hotu,” nia akresenta.
Ekipa Laboratóriu no Forense PNTL tun kedas ba fatin akontesimentu atu halo levantamentu, rekolla evidénsia no halo dokumentasaun fotografika no dokumentál.
“Daudaun Polísia Forense serbisu hamutuk ho ekipa ospitál nian hodi hein prosesu autópsia atubele aprezenta rezultadu ba Tribunál. Ekipa investigasaun no Laboratóriu Forense hala’o hela sira-nia serbisu no ami espera bele ramata iha tempu badak oin mai,” Superintendente Xefe Polísia, katak.
Aleinde ne’e, Departamentu Servisu Investigasaun Kriminál (DSIK) hahú ona investigasaun kriminál formál ba kazu ne’e no prova hotu sei rekolla hodi integra ba prosesu investigasaun.
PNTL mos prepara hela karta ba Tribunál atu hetan mandadu hodi realiza autópsia tuir prosedimentu legál.
Iha oportunidade ne’e, PNTL hato’o sentidu kondolénsia ba família no kolega serbisu sira, ba lakon Ajente ida ne’ebé durante ne’e dedika nia-an ba servisu Polisiál.
“Hodi naran Komandante Jerál, ami hato’o sentidu kondolénsia profunda ba família einlutada no kolega serbisu sira ne’ebé lakon Ajente ida-ne’ebé dedika nia-an tomak ba profisaun Polísia,” nia hato’o.
PNTL apela ba família atu kontinua koopera ho autoridade sira durante prosesu investigasaun, karik iha informasaun ka evidénsia balun ne’ebé presiza rekolla.
Portavós PNTL mós hateten katak, tuir regra institusaun nian, membru PNTL sira ne’ebé ramata oras serbisu labele lori kilat ba uma. Maibé, iha kazu ida-ne’e vítima serbisu iha Korpu Seguransa Pesoál (CSP), ne’ebé hanesan unidade ida-ne’ebé iha responsabilidade atu akompaña entidade Estadu sira iha kualker tempu.
“Matebian rasik serbisu hanesan pesoál CSP no daudaun akompaña Sekretáriu Estadu Asuntu Toponímia no Organizasaun Urbana, Germano Santa Brites. Tanba natureza serbisu CSP nian, iha sirkunstánsia balun membru sira presiza lori kilat,” nia tenik.
Nune’e, Portavós husu públiku atu labele halo julgamentu sedu kona-ba kazu ne’e no respeita família vítima nia privasidade tanba prosesu investigasaun seidauk ramata.
“Nia Diviza Ajente serbisu iha parte Unidade Espesiál. Ita labele julga ema ida no respeita nafatin ba privasidade família nian, provasidade mate-isin nian no buat hotu prosesu investigasaun sei termina,” Portavós reforsa.
Jornalista : Cidalia Fátima
Editora : Julia Chatarina
