BOBONARU, 30 Juñu 2026 (TATOLI) – Implementasaun projetu husi Programa Nasionál Dezenvolvimentu Suku (PNDS) ba reablitasaun estrada rurál iha suku Soilesu, postu administrativu Bobonaru, munisípiu Bobonaru, hatudu progresu di’ak, tanba serbisu fíziku foin la’o besik fulan ida, ekipa konstrusaun konklui ona estrada distánsia metru 120 husi totál metru 290.
Xefe Suku Soilesu, Marito Victor da Costa, hateten implementa programa ne’e la’o tuir planu tanba traballadór sira iha vontade aselera serbisu no fornesedór sira mós mobiliza materiál lokál no fabrikadu atu asegura obra la atraza.
“Agora sira ramata ona metru 120. Falta metru 160 atu to’o bee-tudak Sibi no sa’e mai iha Begini nian. Penahan iha área Lesuaben metru 30 mós halo hotu ona. Ita sura karik progresu atinje 35%. Ita-nia alvu Jullu ne’e hotu ona 100%, tanba programa ne’e mai sedu, entaun la’o di’ak loos”, nia informa ba Tatoli, iha Bobonaru, ohin.
Notísia relevante: Obra Públika Bobonaru halo levantamentu dadus kona-ba estrada rurál iha Soilesu
Tuir nia, reabilitasaun estrada ne’e sei fasilita transporte ba ema no sasán, hadi’a asesu ba servisu saúde, edukasaun, loke dalan bá fatin turizmu bee-tudak Sibi no ajuda komunidade agrikultór sira lori no fa’an sira-nia produtu lokál iha merkadu.
“Komunidade hotu-hotu hili prioridade ida-ne’e, tanba iha tempu bailoro no udan mós risku loos. Udan ita bá ne’e namdoras tanba ho rai-henek hotu. Iha tempu bailoro karreta Angguna sira halo movimentu sei to’o netik iha mota ne’ebá, tanba produsaun agríkola hotu-hotu iha sorin parte Ermera nia”, nia dehan.
Projetu reabilitasaun estrada ne’e implementa ho orsamentu hamutuk $29.807, 06 no ninia durasaun serbisu fulan haat.
Notísia relevante: Populasaun loke estrada foun liga suku Soilesu-Obulo no Lasaun
Jornalista: Sergio da Cruz
Editora: Maria Auxiliadora
