DILI, 15 Jullu 2026 (TATOLI)-Parlamentu Nasionál, liuhusi reuniaun plenária Komisaun Permanente dahuluk deside katak durante períodu resesu sei hala’o reuniaun semana rua dala ida, ne’ebé sei realiza iha loron kinta-feira.
Desizaun ida-ne’e halo atu fó fleksibidade ba deputadu sira durante resesu hala’o atividade polítika iha baze ne’ebé durante hetan impedimentu, halo estudu komparativu sira no tratamentu saúde.
Parlamentu mós hili ona iha Komisaun Permanente nia Sekretária Meza mak Albino da Silva, deputadu CNRT, no Vise-Sekretária Meza mak Irene Gonzaga husi KHUNTO.
Antes ne’e mós bankada parlamentár sira dezigna ona deputadu na’in-26 nu’udar membru Komisaun Permanente hodi hala’o knaar durante resesu fulan rua ne’ebé sei hahú iha 15 Jullu.
Membru Komisaun Permanente no suplente husi bankada CNRT iha na’in-12, Partidu Demokrátiku rua, FRETILIN ualu, KHUNTO rua no PLP rua, ne’ebé sei hala’o knaar hodi garante funsionamentu parlamentár iha tempu resesu nia laran.
Períodu resesu Parlamentu Nasionál komesa iha 15 Jullu no sei tama fali iha 15 Setembru 2026, ne’ebé sei hahú ho sesaun solene.
Notísia relevante: Bankada parlamentár dezigna deputadu na’in-26 ba Komisaun Permanente durante resesu
Jornalista: Nelson de Sousa
Editora: Maria Auxiliadora
