DILI, 16 Jullu 2026 (TATOLI)—Diretór Ezekutivu Servisu Migrasaun, Komisáriu Asistente Polísia Jorge Monteiro, hateten, xineza na’in-44 ne’ebé Servisu Migrasaun halo identifikasaun iha Domingu (02/07) ne’e tama iha territóriu nasionál ho baze legál.
“Sidadaun estranjeiru 44 ne’ebé Departamentu Fiskalizasaun Servisu Migrasaun hetan iha Munisipiu Aileu, tuir fiskalizasaun ne’e primeiru hahú iha loron 02 Jullu iha Munisípiu Kovalima, depois ramata kontinua mai iha Munisípiu Aileu. Rezultadu husi fiskalizasaun mak ita hetan sidadaun estranjeiru iha fatin ida, nia númeru 44 pesoas hela hamutuk iha fatin ida,” Diretór informa liuhusi konferénsia imprensa ne’ebé hala’o iha Ministériu Interiór, Vila-Verde, Kinta ne’e.
Notísia relevante : Servisu Migrasaun klarifika entrada sidadaun indonézia na’in-tolu ho Jet Privadu
Nia dehan, husi identikasaun ne’e, hatudu katak sidadaun estranjeiru sira mai ho dokumentu legál.
“Se nia legalmente vistu turizmu, kualker atividade ruma ita labele aplika hodi selu multa tanba nia la viola vistu ruma no nia la halo serbisu ruma, nune’e ita labele aplika multa hodi selu,” nia akresenta.
Nia esplika, kuandu sidadaun estranjeiru ida tama territóriu nasionál ho vistu turista no depois viola vistu, maka bele aplika multa hodi selu koima ba Servisu Migrasaun tuir lei no regulamentu.
Monteiro hateten, Servisu Migrasaun mós hanesan Autoridade Polísia Kriminál ida tuir lei no orgánika lei númeru 7/2026 artigu 7.
“Tanba ne’e, depoizde ita hetan sira iha ne’ebá ita halo identifikasaun ba indivíduu sira ne’ebé ita bele haruka voluntariámente mai aprezenta-an iha Servisu Migrasaun, hodi nune’e bele halo identifiksaun hodi bele determina vistu ne’ebé sira utiliza tama territóriu nasionál inklui atividade ne’ebé hala’o durante sira estadia iha territóriu nasionál,” nia katak.
Jornalista : Natalino Costa
Editora : Julia Chatarina
