OEKUSI, 21 Outubru 2025 (TATOLI) – Prezidente Asosiasaun Corrida Cavalo Oekusi Ambeno (ACCOA), Mario Muni Salu, rekomenda ba Autoridade Rejiaun Administrativa Espesiál Oekusi Ambeno (RAEOA) atu orienta empreza konstrutora hodi finaliza projetu konstrusaun pista ‘corrida cavalo’, – kuda halai taru, ne’ebé konstrui iha aldeia Noeninen, suku Cunha, sub-rejiaun Pante Makasar.
Notísia relevante:Prezidente Repúblika inaugura pista corrida cavalo iha Pante Makasar
Muni rekomenda tanba projetu referidu konstrui kedas iha tinan-2024 maibé to’o 2025 ne’e, empreza seidauk finaliza, tanba daudaun ne’e ACCOA atu utiliza pista ne’e halo kompetisaun korrida maibé pista referida laiha kondisaun seguru bele afeta ba kuda no joki sira.
“Projetu ne’e, Autoridade RAEOA halo ajudikasaun direita ba kompañia Timor-Lorosa’e atu halo konstrusaun ba pista ne’e, serbisu inísiu ba kampu ne’e iha 2024, prestasaun serbisu ne’ebé asosiasaun hein to’o agora seidauk finaliza, iha atividade lubun ami hala’o ona, maibé uza kampu ne’e ho kondisaun hanesan antes seidauk halo, ita haree kampu ne’e seidauk seguru ba kuda sira atu bele utiliza halo kompetisaun, hau bele dehan risku boot tanba nia lutu ne’e aas liu besik metru-rua, kuandu kuda halai maka’as bele tama husi lutu nia okos ne’e, bele afeta ba joki, no bele monu afeta nia isin-lolon. Ita espera autoridade atuál bele orienta kompañia atu finaliza,” nia hateten ba jornalista sira iha Oekusi, ohin.
Nia lembra, katak antes ne’e konsege utiliza halo kompetisaun, iha joke na’in-neen monu, na’in-tolu monu iha kompetisaun rezultadu kanek todan, na’in-tolu seluk monu iha ámbitu treinu rezulta mós kanek.
“Ida-ne’e, ami hanoin katak konstrusaun kampu korrida ne’e, seidauk bele utiliza ho di’ak, tanba seidauk finaliza tuir standar (padraun), tanba pista ne’e nia dezeñu tuir padraun internasionál, maibé presiza halo fiskalizasaun husi husi parte kompetente liu-liu Governu, tanba kuandu presiza kampu korrida ida ho padraun internasionál ne’ebé di’ak atu kuda sira kuandu halai labele monu no sidi fatuk, maibé projetu ne’ebé on-going antes, oras ne’e paradu hela,” nia hateten.
Notísia relevante:Kompetisaun corrida cavalo iha Oé-Cusse hametin relasaun ho Indonézia
Hatan ba preokupasaun ne’e, Prezidente Autoridade RAEOA, Régio da Cruz Salu, hateten, kontratu termina ona maibé husi empreza koordena ona Autoridade RAEOA atuál hodi reativa fali kontratu anteriór, nune’e bele kontinua fali konstrusaun referida.
“Ita-bele reativa fila-fali kontratu ne’e, tanba kompañia mai koordena autoridade dala tolu ona, iha boa-vontade atu halo, maibé kestaun legalidade ne’e mak akontese agora la’o hela, parte jurídiku halo hela pareser ida, katak ne’e emerjénsia tenke lalais tanba interrese públiku, tan ne’e ita atu deside ona kona-ba autsórs management ba árena kuda ne’e maibé presiza kompletu kontratu anteriór, kompañia rasik konsiente inklui Autoridade RAEOA atuál, tanba saida mak projetu ne’e tarde,” nia hateten.
Líder másimu RAEOA ne’e informa, dokumentu kontratu anteriór, katak bainhira asina ona kontratu, 30% primeiru pagamentu tenke realiza husi RAEOA, maibé defaktu la akontese, kontrusaun atu konklui ona mak foin realiza pagamentu, tanba ne’e empreza rekomenda ona nia kompromisu, mezmu seidauk hetan verba, maibé atu kontinua konstrusaun referida la prevee husi kapasidade empreza, sei defísil uitoan atu kumpre, entaun momentu akontese, kontratu tama ona périodu termina, ho mudansa estrutura Autoridade RAEOA.
“Maibé ita kontinua haree sei reativa fali, atu kontinua, no ami fó ona tempu tanba hetan nafatin konfiansa husi Governu maibé presiza kontinua konstrusaun ne’e atu fó satisfasaun ba objetivu interrese públiku tanba antes ne’e Autoridade empeña konfiansa ba nia,” autoridade ne’e hateten.
Notísia relevante:Autoridade RAEOA realiza kompetisaun “corrida cavalo” hodi festeza 20 Maiu
Entretantu, pista ba kuda halai taru ne’e ho nia medida metru 1.200, ne’ebé obra ne’e ezekuta husi husi empreza Timor-Lorosa’e Unipesoál Lda ho valór kontratu rihun $270 liuhusi ajudikasaun direita husi Prezidente Autoridade RAEOA Sesante, Rogério Tiago de Fátima Lobato.
Jornalista Ajénsia Tatoli,I.P, tenta konfirma asuntu ne’e ho empreza Timor-Lorosa’e, maibé laiha tanba daudaun iha hela Dili.
Jornalista: Abílio Elo Nini
Editór: Rafael Ximenes de A. Belo
