DILI, 03 outubru 2024 (TATOLI)–Akademista Universidade Nasionál Timor-Lorosa’e (UNTL), Janio Tilman, apresia tanba Governu liuhusi Ministériu Edukasaun (ME) bele loke vaga bolsa kandidatu pur méritu ba profesór sira tanba liuhusi vaga ne’e bele identifika profesór ida-idak ninia kapasidade.
“Governu halo esforsu di’ak hodi halo rekrutamentu pur mais méritu, ha’u haree joven sira barak mak liu, balun lian portugés di’ak no inglés di’ak ho hanorin metodolojia di’ak, ha’u haree ha’u-nia kolega sira iha fakuldade Edukasaun idade kiik bele liu bolsa kandidatu. Plataforma di’ak tanba Governu fó ona solusaun para iha futuru ema hanorin karik iha área ne’ebé mak aserta duni,” Akademista UNTL hateten iha ninia knaar fatin, kinta ne’e.
Nia husu atu Governu konsidera profesór sira ne’ebé mak kontribui kleur ona hanesan kuaze tinan-10 ba leten tanba sai profesór ne’e la fasil tanba hanorin estudante barak.
“Ita-nia profesór sira kontribui ona liu tinan 10 to’o 15 lalika halo teste ona, sira hanorin kleur ona ne’e pasti sira hatene tanba durante ne’e sira kontribui di’ak hela ne’e, fó sira oportunidade tanba sira mós idade ona, ne’e para sira reforma karik iha netik bukae oan ida para sira bele haree sira-nia família. Governu halo balansu ba sira ne’ebé mak sei forsa di’ak liu ba teste, no ba sira ne’ebé mak kontribui kleur ona ne’e konsidera netik ba, rekruta espesiál ida ba sira,” nia akresenta.
Notísia relevante : ME hahú koloka profesór admitidu bolsa kandidatu iha fulan-outubru
Iha fatin ketak, Peskizadór, Domingos Carlos Xicava, reforsa, edukasaun atu la’o di’ak ne’e Governu presiza tau orsamentu boot iha setór edukasaun tanba iha eskola sira iha área rurál barak mak menus fasilidade eskola hanesan karteira eskolár (meza no kadeira) no seluk tan.
“Ita-nia edukasaun iha Timor problema orsamentu, tanba alokasaun orsamentu ba edukasaun ne’e kiik tebes, ida-ne’e la to’o atu hadi’a fasilidade tanba ita haree problema edukasaun iha fatin-fatin no la’ós fasilidade de’it mak presiza hadi’a maibé ideia husi estudante sira oinsá mak kontribui ba Estadu. Liu-liu iha área rurál ne’e menus fasilidade hanesan kadeira no meza, ne’ebé la seguru ba estudante sira atu apreende,” nia reforsa.
Peskizadór sujere ME fó formasaun pedagojia ba profesór sira atu haree métodu ida-ne’ebé di’ak ba estudante sira.
Jornalista : Osória Marques
Editora : Julia Chatarina
