DILI, 21 setembru 2023 (TATOLI) – Esquadra Polísia Nasionál Timor-Leste (PNTL) Munisípiu Dili, hetan apoia hosi COE no Batallaun Ordem Publika (BOP) hakalma asalta malu entre joven sira ne’ebé perturba orden publika iha Suku Bairo-Pite, Postu-Administrativu Dom-Aleixo konsege asegura joven mane ida ne’ebé deskonfia envolve iha asaltu ne’e.
“Ekipa servisu simu informasaun hosi komunidade katak mosu konfrontu entre joven grupu rua hosi GAM-PSHT no GAR-77 tanba ho kondisaun lanu halo ameasa to’o asalta malu hodi rezulta vitima nain rua ho naran inisiál RJB no ISM ne’ebé hela iha area Perumnas Bairo-Pite kanek”, hatete iha komunikadu ne’ebé Agência TATOLI asesu hosi Media PNTL, ohin.
Ho informasaun hirak ne’e, ekipa servisu ne’ebé envolve mós Makikit no Aranha Oeste to’o kedas iha fatin akontesimentu halo atuasaun duni joven sira halai namkari no konsege detein suspeitu ida ho naran inisial SS nudar estudante ida ne’ebé hela iha Fomentu Comoro.
Iha fatin akontesementu, komunidade sira ladún koopera di’ak ho autoridade seguransa hodi foti suspeitu sira nune’e ekipa servisu kontatu kedas ho Autoridade Lokál iha fatin ne’e atu fasilita PNTL buka tuir suspeitu sira seluk ne’ebé envolve iha krime jerál ba kazu asaltu iha Suku Bairo-Pite.
Daudaun ne’e, suspeitu sira, PNTL asegura hela iha sela Eskuadra Dom Aleixo hodi submete ba prosesu investigassun.
Jornalista: Hortencio Sanchez
Editór : Zezito Silva
