BAUCAU, 16 jullu 2024 (TATOLI) – Autoridade lokál husu Governu atu kontinua hadi’a fatin turismu komunitária iha área tasi fatuk boot, aldeia Uani-uma, suku Caibada, postu administrativu Baucau Vila, munisípiu Baucau.
Xefe Suku Caibada, Cosme da Costa Lopes esplika, antes ne’e iha lideransa anteriór liuhusi Oitavu Governu Konstitusionál konstrui ona uma laku inklui fatin saneamentu iha área tasi referida maibé projeitu ne’e seidauk finaliza no kondisaun atuál hetan estragus inklui laiha kondisaun hanesan estrada nune’e difikulta turista sira bainhira vizita iha fatin ne’ebá.
“Problema mak kondisaun, halo tiha uma maibé la kria kondisaun, ha’u husu ba Governu agora kria kondisaun liuliu estrada, bee-moos, eletrisidade no moru protesaun,” Xefi suku Caibada hateten iha Vila Nova, segunda ne’e.
Governu liuhusi Ministériu Turismu, Komérsiu no Indústria (MTKI) iha tinan-2022 apoia orsamentu hamutuk rihun $40-resin ba komunidade liuhusi autoridade suku ne’ebé konstrui ona uma laku hamutuk 17 kompleta ho saneamentu rua.
Cosme Lopes, rekomenda ba Governu liuhusi Ministériu Turismu no Ambiente atu tau atensaun hanesan reabilitasaun estrada, bee-moos no presiza konstrui moru protesaun nune’e bele asegura vizitante sira bainhira pasa ferias iha área referida.
“Sé kompleta ho eletrisidade bainhira ba halo serimónia iha-ne’ebá bele fasilita ona,” Cosme Lopes akresenta.
Husi observesaun Agência TATOLI iha terrenu nota uma-laku hirak-ne’e inklui kalen saneamentu hahu estragus husi anin no iha kondisaun ne’ebé presiza hetan atensaun.
Jornalista : Natalino Belo
Editór : Evaristo Soares Martins
