MAUBISSE, 13 Outubru 2025 (TATOLI)-Prezidente Autoridade Munisípiu (PAM) Ainaru, Manuela Georgina Carmo, apresia Ajénsia TATOLI hamosu programa Tatoli Hakbesik sai ponte entre Estadu ho Povu, ne’ebé realiza iha Pouzada Maubisse, Munisípiu Ainaru.
“Agradese tebes ba programa ida-ne’e, hodi hakbesik ita ba povu nia leet. Programa ne’e hafanun ami atu hakbesik liután bá povu”, PAM ne’e hato’o iha ámbitu diálogu ne’ebé organiza husi Tatoli ho tema “Prezidente Ramos-Horta ho Povu”, iha pouzada Maubessi, segunda ne’e.
Ho ida-ne’e kondisaun ne’ebé autoridade iha ho esforsu hotu ho programa Governu desentralizasaun administrativa no podér lokál parte autoridade prontu simu ba dezenvolvimentu munisípiu nian.
Autoridade munisípiu agradese ba Ajénsia Tatoli iha parte dader realiza ona programa talk show ba preparasaun autoridade munisípiu Ainaru, Aileu, Kovalima no Manufahi ninia preparasaun simu podér lokál.
“Kondisaun mínimu ne’ebé iha mak ami preparadu ona, atu hasoru desentralizasaun no ami kontente tebes hasoru programa dezentralizasaun, tanba hein kleur ona, espera katak tinan rua tán bele ona simu kompeténsia atu jere ami-nia munisípiu rasik,” nia dehan.
Prezidente Konsellu Diretivu Ajénsia Tatoli, Noemio Falcão, hateten Tatoli hanesan Ajénsia Notisioza Estadu nia papél mak oinsá atu promove atividade Estadu nian.
Lidér másimu mídia estatál ne’e agradese ba kolaborasaun tomak no parseiru sira ne’ebé fó apoiu ba programa.
“Ami hahú iha Maubisse no tinan oin sei haleu munisípiu sira hotu, tanba mídia papél oinsá mak disemina informasaun no promove komunikasuan ba povu”, nia salienta.
Nune’e mós Sekretáriu Estadu Komunikasaun Sosiál (SEKOMS), Expedito Dias Ximenes, sente kontente tebes ho atividade mídia estatál TATOLI halo programa ne’e no Prezidente Repúblika bele sai oradór prinsipál ba diálogu.
“Prezidente Repúblika hanesan aman ba Nasaun no lidér diplomátiku seniór iha mundu no ita orgullu ba nia prezensa iha-ne’e. Ita hotu nia prezensa hanesan fini ba Programa Hakbesik, programa ne’e sei la kompletu se ita laiha diálogu ne’ebé ita halo ho livre,” nia hateten.
Programa ne’e diálogu ho tema Ramos-Horta ho Povu.
“Ha’u liga ba pontu rua, ho tema Hakbesik katak, ha’u-nia konteúdu loloos mak Ramos-Horta ho Povu katak, Prezidente Repúblika hamutuk ho povu fó espasu ba komunidade sira no promove transparente entre Estadu no povu, ita tenke buka dalan halibur povu, rona povu no husi ida-ne’e mak ita bele fó ba povu realidade ida ne’ebé sira hakarak,” Expedito Dias Ximenes hateten.
Governante ne’e agradese ba autoridade munisípiu haat, komunidade hotu hodi apoiu programa ne’e. Hodi garante katak komunikasaun Governu sei lao la’ós sentraliza de’it iha Dili maibé mai mós iha baze no hein katak hala’o iha Maubisse no tempu tuir mai iha mós fatin seluk.
Nia hateten, PR ho Primeiru Ministru, Xanana Gusmão, hanesan líder estadista no kontinua rona povu nia lian. Ba diálogu ne’e hatudu katak PR la’ós serbisu de’it iha palásiu maibé mai hodi rona povu no diálogu ne’e hanesan fundasaun ida atu halo Estadu no sosiedade ida transparante no inkluzivu liután.
Entretantu, diálogu ne’e oradór husi Prezidente Repúblika, José Ramos-Horta, no marka prezensa Prezidente autoridade munisípiu Ainaru, Aileu, Kovalima, lidér komunitáriu, komunidade, autoridade seguransa, emprezáriu, veteranu no seluk tan.
Notísiarelevante:https://tatoli.tl/2025/10/12/tatoli-realiza-dialogu-rejional-ho-tema-prezidente-ramos-horta-ho-povu-iha-maubisse
Jornalista: Nelson de Sousa
Editór: Evaristo Soares Martins
