OÉ-CUSSE, 15 novembru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kuarta ne’e hatuur fatuk dahuluk hodi harii Eskola Pré-Eskolár (EPE) unidade rua no Eskola Bázika Filiál (EBF) ida iha aldeia Sanane, suku Costa, sub-rejiaun Pante Makasar.
Notísia relevante: Investimentu ensinu pré-eskolár hosi nível aldeia sai prioridade ba Autoridade RAEOA
Eskola Pré-Eskolár rua, ida harii iha bairu Oétulu, ida harii iha eskola 30 agostu bairru Masin hamutuk ho Eskola Bázika Filiál ida.
“Eskola ne’e bainhira hahú, ita-nia oan sira bele hahú ona eskola, la presiza la’o dook ona,” Prezidente Autoridade RAEOA, Arsénio Paixão Bano, ko’alia iha ambitu serimónia hatuur fatuk dahuluk realiza iha bairru Oétulu.
Tuir nia, iha suku Costa, aldeia Sanane bairu Oétulu ho Masin geografikamente luan akumula populasaun barak, entaun oan sira mós barak, iha Masin populasaun barak, labarik ki’ik barak tebes, zona sentrál só iha pré-eskolár tolu, CÁFE Palaban, Dominkana no pré-eskolár Atoni iha Santa-Rosa.
“Bainhira ita halo eskola ba ita-nia oan sira, ne’e ita investe ba sira-nia futuru no nasaun Timor-Leste, entaun eksola sira-ne’e hotu, ha’u husu oan sira labele iha uma, tenki mai, ne’e importante tanba bainhira rai ne’e susar ba osan, só ema matenek mak bele buka maneira oinsa hetan osan,” nia fó hanoin.
Direitór Diresaun Rejionál Infraestrutura, Candidu Dos Reis Amaral, espera kompañia sira, ezekuta projetu hirak-ne’e, persiza garante kualidade no kumpri termu kontratu.
“Kompañia sira-nia obrigasaun maka tenki oferese obra sira-ne’e ho kualidade, tuir dezeñu ne’ebé iha, iha obrigasaun seluk persiza la’o tuir duni, konstrusaun kontratu ne’ebé maka aseita ona entre kompañia ho Prezidente Autoridade, ne’ebé reprezenta Governu Sentrál no Estadu Timor-Leste iha Oé-Cusse, hein katak kompañia sira kumpri ordén sira-ne’eb’e hakerek ona iha kontratu,”nia husu.
José Falo, nu’udar lia-na’in aldeia Sanane, orgullu, tanba foin ba dahuluk Governu harii fasilidade edukasaun iha sira-nia bairru, nune’e bele fasilita ona sira, asesu eskola ho distánsi besik.
“Ami bairru Oétulu, ami hato’o agradesimentu bo’ot ba projetu ne’e, tanba primeira-véz Governu harii Pré-eskolár ida iha ami-nia bairu Oétulu, desde tempu pásadu okupasaun, ami seidauk hetan obra hanesan ne’e, to’o ita ukun-an ohin mak foin hetan projetu ida-ne’e atu fasilita oan sira asesu eskola ho besik,” nia orgullu.
Notísia relevante: RAEOA aloka millaun $2-resin harii eskola foun 19 no hadi’a edifísiu rua
Entretantu, projetu pré-eskolár iha bairu Oétulu, ezekuta hosi kompañia lokál Leorota Unipesoál Lda ho valór kontratu hamutuk rihun $79,541.16, pré-eskolár iha 30 de Agostu Masin ezekuta hosi kompañia Lorotias Unipesoál Lda ho valór kontratu rihun $83,099.98.
Kona-bá konstrusaun Eskola Báazika Filiál, 30 de Agostu Masin, ezekuta hosi kompañia Neon-Bahan Unipesoál Lda ho valór kontratu $84,886.57. orsamentu hirak ne’e Autoridade RAEOA aloka hosi Orsamentu Jerál Estadu (OJE) 2023 nian, ho durasaun servisu durante fulan 10.
Jornalista: Abílio Elo Nini
Editor: Evaristo Soares Martins
