DILI, 24 Maiu 2025 (TATOLI) – Avelino Maria Coelho da Silva, promete sei repete luta hasoru Rejime Soeharto iha prosesu luta ba libertasaun nasionál ho konfiansa foun ne’ebé IX Governu Konstitusionál delibera nu’udar Komisáriu ba Konsellu Supervizaun Greater Sunrise, tanba prosesu dezenvolvimentu kadoras Greater Sunrise nu’udar mehi boot timoroan tomak nian.
Governu liuhusi desizaun koletiva Konsellu Ministru delibera hodi autoriza Ministru Petróleu no Rekursu Minerál, atu nomeia Avelino Maria Coelho da Silva no José Manuel Gonçalves, nu’udar Komisáriu Timor-Leste ba Konsellu Supervizaun Greater Sunrise.
Governu konsidera órgaun ida-ne’e responsável ba supervizaun estratéjika Rejime Espesiál Greater Sunrise nian, iha ámbitu Tratadu Fronteira Marítima entre Timor-Leste no Austrália.
Hafoin Konsellu Ministru delibera, Avelino Coelho agardese konfiansa husi Ministru Petróleu no Rekursu Minerál, Francisco Monteiro, ne’ebe aprezenta kandidatura Primeiru-Ministru, Kay Rala Xanana Gusmão atu tetu no fó konfiansa asume responsabilidade todan ne’e.
Eis Sekretáriu Konsellu Ministru ne’e hatene serbisu ne’e todan, maibé nu’udar kontributu ida tán tenke fó iha luta ba dezenvolvimentu indústria minarai no gás, hodi fó apoia ba Kay Rala Xanana Gusmão.
Avelino Coelho hato’o agradesimentu espesiál ba konfiansa pesoáll husi Kay Rala Xanana Gusmão hodi aseita proposta no nomeia iha ida-ne’e.
“Ha’u mós hakarak relembra katak konfiansa agora ha’u simu hanesan mos konfiansa uluk, durante luta, ne’ebe fó knaar ba ha’u nu’udar Konselleiru Polítiku Militár no Kolaboradór Estadu Maiór FALINTIL husi tinan 1995 – 1999 atu organiza luta polítika no Militar (BN) Urbana nu’udar meiu atu halo pressaun (Indonesianizasaun konflitu polítiku-miitár) ba Rejime Soeharto hodi buka solusaun polítika ba arrastadu konfitu polítiku-militár Timor-Leste no Indonézia,” refere Avelino Coelho liuhusi plataforma plataforma rede sosiál facebook, sesta ne’e.
Nune’e mós nia hakarak agradese mós konfiansa husi Ministru Estadu Prezidénsia Konsellu Ministru, Agio Pereira, tanba nu’udar amigu tempu naruk luta nian (1989 -1999) no membru Konsellu Ministru hotu, ne’ebé endossa proposta nomeasaun importante ein detrimentu atu serbí Nasaun no Povu.
Avelino Maria Coelho mós la haluha hato’o agradesimentu amigu, amiga no entidade hotu hato’o felisitasaun liuhusi plataforma oinoin iha ámbitu nomeasaun husi Konsellu Ministru, iha loron 22 Maiu 2025.
“Ita hotu iha expetativa ba industrializasaun kosta súl, ita hotu sei kontribui, la haree ba kargu ne’e boot ka kiik, todan ka kmaan. Kargu la detemina ita-nia dignidade, serbí ita-nia luta ba liberta Povu maka aktu nobre no dignu ita hotu nian,” Komisáriu foun ba Konsellu Supervizaun Greater Sunrise afirma.
Notísia relevante: Governu nomeia Avelino Coelho ba Konsellu Supervizaun Greater Sunrise
TATOLI
