DILI, 18 Maiu 2024 (TATOLI) – Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, hasoru malu ho Calema, duo muzikál husi São Tomé e Príncipe, iha Farol.
Iha sorumutu ne’e Calema dehan sente satisfeitu vizita Timor-Leste, tanba iha istória entre Timor-Leste ho São Tomé ne’ebé ko’alia dalen ofisiál ida ne’ebé halo parte iha Comunidade dos Países de Língua Portuguesa (CPLP).
“Entaun ami mai vizita Timor-Leste no ami sente hanesan iha ami-nia uma. Timor-Leste no São Tomé e Príncipe nia uma no ema atu hanesan”, Calema espresa bainhira konversa ho ministru Kalbuady Lay.
Vise-Ministru bainhira simu vizita dupla muzikál ne’e hateten ida ne’e la’ós vizita ba dahuluk no dahikus nian, maibé sei bele mai Timor-Leste dalabarak tan, tanba ema barak mak hein sira-nia prezensa.
Governante no artista na’in-rua ho nia ekipa ne’e konversa mós kona-ba istória Timor-Leste luta iha tempu kolonializmu portugés no invazaun Indonézia nian iha 1975 bá kotuk.
“Ita-nia proklamasaun independénsia akontese iha 1975 ho koloniál portugés, maibé mosu fali ho invazaun Indonézia nian. Ita restaura fali independénsia iha 20 Maiu”, ministru relembra.
Iha okaziaun vizita ne’e mós governante hatudu ba Calema ho nia ekipa imajen ka fotografia fatin turístiku sira hanesan Jaco, Cristo Rei, Illa Ataúro, Bee-manas Marobo, Tasi Uatabó no seluktan. Aleinde ne’e, aprezenta uma tipikál Timor-Leste nian no Ai-Kameli ne’ebé hanesan símbolu identidade nasaun nian.
Antes ne’e, Calema mós hasoru malu ona ho Primeiru-ministru Kay Rala Xanana Gusmão, iha Palásiu Governu, iha sesta ne’e.
Artista internasionál ne’e mai Timor-Leste atu halo konsertu iha portu Dili, iha Festivál Tasifest, iha loron 19 Maiu, ne’ebé hetan apoiu hosi setór privadu sira iha Timor Leste.
Calema nu’udár duo múziku maun-alin mai husi São Tomé e Príncipe, ne’ebé agora hela iha Portugál, no forma husi maun António Mendes (5 abríl 1992) no alin Fradique Mendes Ferreira (19 marsu 1987). Naran dupla ne’e refere ba laloran boot, espesialmente iha área tasi-ibun Áfrika nian.
Calema grava ona albun tolu hanesan Bomu Kêlê, ne’ebé lansa iha 2014 ho gravadora Calema, A Nossa Vez lansa iha20 fulan-Outubru 2017, múzika ne’ebé ema barak liu haree iha youtube kanta iha luzofónia, ho gravadora classik no yellow ne’ebé lansa iha 07 Fevereiru 2020.
Notísia relevante: Artista Calema hasoru PM Xanana, “Ami sente hanesan iha uma rasik”
Jornalista: Jesuína Xavier
Editor: Maria Auxiliadora
